БІЛІМДІ ТӘЖІРИБЕМЕН ҰШТАСТЫРСАҚ, ҰТАМЫЗ
Техниканы талапқа сай меңгерген мамандарға зәруміз. Сондықтан өндірісіміз тоқырап, қыруар қаржыға белшеден батпас үшін оқу үдерісіне тың бағдарлама енгізілуі шарт.
Мемлекет басшысы «Қазақстанның әлеуметтік жаңғыртылуы: Жалпыға Ортақ Еңбек Қоғамына қарай 20 қадам» атты бағдарламалық мақаласында осыған ерекше екпін берді. Аталған талап үдесінен көріну мақсатын көздеп, Қазтұтынуодағының сауда-экономикалық колледжі дөңгелек үстел жиынын өткізді.
Басқосуда сөз алған «Нұр Отан» ХДП Астана қалалық филиалы төрағасының бірінші орынбасары Қайрат Жаңабергенов Елбасының бағдарламалық мақаласында барлық салаға міндеттер жүктелгенін мәлімдеді. Соның ең бастысы – кәсіптік білім беруді уақыт талабымен үндестіруіміз қажет.
Астана қалалық мәслихатының хатшысы Сансызбай Есілов елордамызда инженер, механиктердің жетіспейтінін және кейбір колледждер өздерінің мүмкіндігіне сай емес маман даярлап отырғанын алға тартты. Ал сауда-экономикалық колледжінің түлегі Айнұр Құспан жаңадан жұмысқа қабылданғандарға сынақ мерзімін ұзартуды қозғады.
Сауда-экономикалық колледжінің директоры Мырзабек Күжімов модульді бағдарламаның ерекшелігіне түсініктеме беріп, жекелеген олқылықтың себеп-салдарын ашып айтты.
Әмірхан АЛМАҒАНБЕТОВ