№6 қалалық емхананың хирургия бөлімінде Амбулаторлық хирургия орталығы жұмыс істейді. Орталықта қандай медициналық қызметтер көрсетілетіні туралы хирург Қуаныш Құсмановпен әңгімелестік.
Хирургия бөлімінің құрамында 10 жылдан астам тәжірибесі бар жоғары және бірінші санатты хирург-дәрігерлер жұмыс істейді. Орта медициналық персоналдар да хирургия саласы бойынша оқытылған және білікті.
– Аты айтып тұрғандай, операциялар емханаға келген күні жасалады, науқас процедураны алған соң үйіне қайтады. Ең басты артықшылығы – жалпы наркоздың қолданылмауы, сондықтан отадан кейінгі бас ауруы, әлсіздік, бас айналу, жүрек айну секілді жағдайлар болмайды, – дейді дәрігер.
Барлық оталар санитарлық-эпидемиологиялық талаптарды сақтай отырып жасалынады. Операциялық блоктар және операциядан кейінгі палаталар да қарастырылған.
– Қазіргі уақытта №6 қалалық емханада хирургтар тері мен тері асты тінінің түрлі жаңа өскіндерін жою, әртүрлі деңгейдегі іріңді-қабыну ауруларын емдеу операцияларын жүргізеді. Ең маңыздысы, бұл қызметтердің барлығы МӘМС аясында тегін көрсетіледі, – дейді Қуаныш Құсманов.
Мұнда қызмет алу үшін алдымен операциялық емдеу тактикасы мен көлемін анықтайтын хирург дәрігердің кеңесі керек. Одан кейін қажетті тексерулерден өтсе, процедура күні белгіленеді.
– Сонымен қатар, блефаропластика, липосакция және отопластика секілді бағыттар бойынша пластикалық хирургтің тегін кеңесін алуға болады. Айта кететін жайт, хирургиялық бөлімде айына шамамен 25 ота жасалады. Бұл операциялық блоктың күнделікті белсенді жұмыс істейтінін білдіреді, – деп атап өтті дәрігер.
Гүлмира АЙМАҒАНБЕТ
