Тұңғыш Президент күні Астана салтанатты шаралардың басты сахнасына айналды.
Ең ауқымды мерекелік концерт «Бір Отан, Бір тағдыр, Бір Елбасы!» деген атпен елордадағы 30 мың адам оңай сыйып кететін «Астана- Арена» стадионында өтті.
Шараға Мемлекет басшысы Нұрсұлтан Назарбаев бастаған бір топ билік өкілдері де қатысты.
«Басына көтерген халқымнан айналайын!»
Тұңғыш Президент мерекесінің күнтізбедегі дәл осы күнге қызыл әріппен белгіленуінің тарихы әріде жатыр.
1991 жылдың 1 желтоқсанында Қазақстан Республикасында алғашқы жалпы халықтық Президент сайлауы өтіп, сайлаушылардың 98,78 пайыз даусымен Нұрсұлтан Назарбаев жеңіске жеткен еді.
Жиынның құттықтау сөзін сөйлеген Елбасы: «Бүгін жай күн емес, Тұңғыш Президент күні мейрамы. Ал Тұңғыш Президент – ол мен. 1991 жылы тұңғыш рет мен сайланған болатынмын. Бірақ, мәселе онда емес. Осы жылы қазақ халқы өзінің тарихында тұңғыш рет тәуелсіз ел болып, Көшбасшысын сайлады. Сол сенімнің арқасында мен Қазақстанның тәуелсіздігін жарияладым. Әйтпесе, ол болмас еді. Халық менің мойныма үлкен жауапкершілік артып, иығыма көп нәрсені жүктеді. Сондықтан, мен тек қана халықтың тапсырмасын орындаған адаммын. Талайдан бері қолдап, қорғап бірнеше мәрте сайлап, басына көтерген халқымнан айналайын. Елге қызмет етуден ешқашан талмаймыз!» деді.
Өз атына айтылып жатқан жақсы сөздерге ризашылығын білдірді.
Тәуелсіздік жылдарындағы табысты еңбек пен жемісті жұмысты жасаған қазақ халқы, қазақстандықтар екенін баса айтып өтті.
«Жиырма жылда жүз жылдық жетістікті бағындырдық!»
Елбасының жиі айтатын бұл сөзін бүгінде әлем алпауыттарының өзі еріксіз құптайды. Құптамасқа амалы жоқ.
Расында, Қазақстан жиырма жылдың ішінде басқа мемлекеттер жүз жылда жетпеген жетістіктерге жетті. Енді, міне, елдікті еңселі, тәуелсіздікті тұғырлы ететін тағы бір мемлекеттік мерекенің тұсауын кесіп, дүбірлетіп атап өтті. Олай етуге хақысы бар.
Мемлекет басшысы мерекелік жиында «Біз бар болғаны жиырма жылдың ішінде адамның ойына келмейтін, армандамайтын мақсаттарға жеттік. Біріншіден, әлем картасында жоқ мемлекетті құрдық. Екіншіден, елдің экономикасын түзеп, жағдайын жасадық. Ешбір қазақ шетелде батырақ болып жүрген жоқ. Керісінше, олар бізге келіп жұмыс істеп жатыр. Үшіншіден, біз мемлекеттің қауіпсіздігін нығайттық. Төртіншіден, Қазақстанды бүкіл дүние жүзіне паш еттік. Бізді сыйлап, құрмет тұтатындар көбейді» деді.
Біз бағындырған бұл биіктер, әрине, Елбасының көреген, сарабдал саясатының арқасы екені сөзсіз. Өйткені, қазақтың шыққан қай шыңы да Нұрсұлтан Назарбаевтың есімімен тығыз байланысты.
Елі еріне сенім артса, ері еліне арқа сүйейді
Қара күштің емес, ой мен білімнің ғасыры келгендігін үнемі қайталайтын Президент жастарға арқа сүйейтінін осы жолы да айтып өтті. Залға жиналған жұрттың жартысынан көбі жастар болғандықтан, соларға қаратып: «Сіздер, жастар, тәуелсіздіктің құрдасы болып табыласыздар. Сіздер басқа заманда өмірге келдіңіздер. Мына ұлы далада бабаларымыздың қаны мен тері төгілген. Сол кең даланы әрі қарай аман-есен алып барып, ұрпақтан-ұрпаққа жеткізу – сіз бен біздің парызымыз» деді.
Қазақстанды бүкіл дүниежүзі танығанын, еліміз үлкен құрметке бөленгенін тағы бір тілге тиек етті.
«Болашақта осы жұмыстарды әрі қарай атқаратын сіздер боласыздар. Сондықтан, жасалып жатқан барлық шаруалар сіздер үшін! Біздің мойнымыздағы міндет болашақта жастарға жүктеледі» деді Президент.
Қазақ жастарының бұл мақсат-міндетті жауапкершілікпен атқаратынына сенімін де білдірді.
Болашақ бүгіннен басталады
«2050 жылы менің ойымша, Қазақстан сауатты халық болады. Ел халқы үш тілді жетік меңгереді. Қазақ тілі жаппай қазақстандықтардың тілі болады да, соның төңірегінде Қазақстан ұлты деген бір ұлт пайда болады» деді Президент.
Осы орайда Мемлекет басшысы жастарды білім мен бәсеке жолында еңбек етуге шақырды.
«2050 жылы жер бетінде 9 млрд адам тұратын болады. Олардың ішінде өзара бәсекелестік артады. Осы бәсекеден біз жеңіп шықпасақ, артта қалуымыз мүмкін. Сондықтан, еліміздің жастары осы мақсат-міндет жолында еңбектенуі тиіс» деп түйіндеді сөзін.
Сәні бөлек салтанат
Мерекелік кештің есте қалар ерекше тұсы көп болды. «Көрген де арманда, көрмеген де арманда» деген тіркес еске түседі мұндайда.
Мәдениет басқармасының бастығы Болат Мажағұловтың айтуынша, Елбасы спорт пен мәдениетке жаны жақын адам болғандықтан, шара спорт және мәдени шоу ретінде ұйымдастырылыпты.
«Бір Отан, бір тағдыр, бір Елбасы!» спорттық бұқаралық акциясы барысында тек қойылымның өзіне екі мыңға жуық адам қатыстырылды.
Ұйымдастырушылардың айтуынша, жиналған адам саны стадионның сыйымдылығынан да асып жығылыпты.
Бағдарламасы үш ай бойы пысықталған концерттің тізгінін белгілі спортшы Серік Сәпиев, әнші Мәдина Сәдуақасова және актер Азамат Сатыбалды ұстады.
Айтулы іс-шараға әзірлік кезінде күндіз күлкі, түнде ұйқы көрмеген ұйымдастырушылар көрермен көңілінен шығу үшін аянып қалмаған сыңайлы.
Мерекелік бағдарламада Қазақстанның ел болып қалыптасу жолы мен 21 жыл ішінде жеткен жетістіктерін айшықтайтын қойылымдар көрсетілді.
Залда отырған жастар қолдарындағы түрлі-түсті жалаушалармен «Елбасы», «Астана», «Нұрсұлтан», «Президент» сөздерін бейнелеп отырды.
Ортадағы алаңда бишілердің салтанатты биін велоспортшылардың шеруі жалғастырды.
Концертте Ерболат Құдайбергенов, Мәдина Сәдуақасова, Жұлдыз, «Ринго», «Алаш ұлы» топтары мерекеге арнайы жаздырған әндерін орындады.
Кеште концерттік бағдарлама-мен қоса Тәуелсіздік жылдары, Елбасының еңбек жолы, еліміздің экономикалық-саяси, мәдени даму кезеңдері туралы бейнематериалдар көрсетілді.
Шынар ДОСАН
