БИЫЛҒЫ БЮДЖЕТ ҚАЙТА ҚАРАЛДЫ
Жыл соңы таянғанда елорда бюджетіне өзгеріс енгізілді. Кеше мәслихаттың кезектен тыс оныншы сессиясында депутаттар бас қаланың қаржылық ахуалын пысықтап, әуелгі жоспарға біршама өзгерістер мен толықтырулар енгізді. Астананың әмиянындағы ақша сөз болған жиынға депутаттармен бірге қала әкімінің бірінші орынбасары Сергей Хорошун қатысты.
Депутаттардың кезектен тыс сессияға жиналуына түрткі болған да осы бюджет мәселесі. Нақты айтсақ, жақында ҚР «2012-2014 жылдарға арналған республикалық бюджет» туралы заңына өзгерістер мен толықтырулар енгізілді. Бюджет жобасы нақтыланып, нәтижесінде Астана қаласының бюджетіне республикалық бюджеттен 15 384 060 мың теңге трансферттер бөлу қарастырылған. Сондай-ақ, қайта бөлу есебінен жалпы сомасы 5 595 564 теңге трансферт қысқартылды.
– Бұдан бөлек, бюджеттің бұл нақтылануында Астана қаласы бюджетінің кіріс бөлігін көбейту мен жүргізілген мониторинг негізінде жекелеген бюджеттік бағдарламалардың қаржысын қайта қарастыру көзделіп отыр. Аталған қаржыны елорданың дамуы мен кезек күттірмейтін әлеуметтік мәселелерді шешуге бағыттауды ұсынамыз, – деді Экономика және бюджеттік жоспарлау басқармасының бастығы Жанат Нұрпейісов.
Қаңтар және қазан айларында қала бюджетінің өзіндік кірісі 108 пайызға орындалған. Әуелгі жоспарда 73 205,7 млн теңге болады деп болжанған-ды. Бүгінгі көрсеткіш 79 036,1 млн теңгені көрсетіп отыр.
Жоспардың артығымен орындалуын салықтан түскен түсім (4 608,6 млн теңге) құрап отыр. Осыны негізге алған Жанат Нұрпейісов кіріс бөлігінің жылдық жоспарын 5 631,7 млн теңгеге ұлғайтуды ұсынды. Соның ішінде 2 479,4 млн теңге салықтық, 3 152,3 млн теңге салықтық емес түсімдер құрамақ. Күні бұрын бұл мәселені комиссияда егжей-тегжей талқылаған депутаттар басқарма бастығының ұсынысын қос қолын көтермесе де бірден қолдады.
Сессиядағы талқыланған тағы бір маңызды жаңалық – алдағы мерекемен байланысты. 1 желтоқсан күні елімізде бірінші рет Қазақстан Республикасының Тұңғыш Президентінің күні тойланатыны баршамызға белгілі. Осыған орай, халықтың әлеуметтік тұрғыда аз қамтылған тобына бір реттік әлеуметтік жәрдемақы көрсетілмек. Мұқтаж азаматтарға қандай көмек және қалай көрсетілетіні туралы Жұмыспен қамту және әлеуметтік бағдарламалар басқармасы бастығының орынбасары Ләззат Абеуова баяндады. Ұлы Отан соғысының ардагерлеріне 20 мың, ҰОС ардагерлеріне теңестірілген, Ауғанстан соғысының ардагерлеріне, соғыс ардагерлерінің жесірлеріне 10 мың теңге көлемінде көмек көрсетілмек. Сонымен бірге мұндай көмекпен жетімдер мен көпбалалы отбасылар да қамтылады. Бұл мақсатқа жергілікті бюджеттен 125 млн теңге көзделіп отыр. Депутаттар бұл ұсынысты да бірауыздан қолдады.