БІЗДІҢ ДӘРІГЕРЛЕР ОТБАСЫ МҮШЕЛЕРІН ТҮГЕЛ ТЕКСЕРЕДІ
Айша БЕСТАЕВА, Астана қаласындағы «Демеу» отбасы оқу-тәжірибелік медициналық көмек көрсету орталығы бас дәрігерінің орынбасары:
– Сәлеметсіздер ме?! Есімім – Асылбек. Білейін дегенім, басқа емханалардан сіздердің орталықтарыңыздың басты айырмашылығы неде?
– Орталығымызда басқа емханалардағыдай нефролог, уролог, гинеколог және басқа да мамандар жоқ. Бізде тек отбасылық дәрігерлер және мейірбикелер ғана қабылдау жүргізеді. Олар бірнеше бағытта жұмыс істейді, сондықтан да біздің мамандар отбасының барлық мүшелерін түгел тексереді. Яғни, біздегі отбасылық немесе жалпы тәжірибелі дәрігерлер балаларды да, ересек адамдарды да, яғни, отбасы мүшелерін тегіс қарайды. Бұл отбасы мүшелеріне де, дәрігерге де өте ыңғайлы. Өйткені, басқа емханаларда балаларды педиатр, үлкендерді терапевт қараса, жалпы тәжірибелі дәрігер отбасына барған кезде олардың барлығына бірдей медициналық көмек көрсетеді. Осы арқылы біз отбасы мүшелерінің тұрмыс жағдайын, әлеуметтік ахуалын біліп қана қоймай, оларға психологиялық, әлеуметтік көмек көрсету үшін нені басымдыққа алу керектігін, жалпы аурудың қалай қарай бет алып бара жатқанын қадағалап, бақылап отырамыз. Біздің орталықта басқа емханалардағы сияқты тұрғындарға алғашқы медициналық көмектің барлығы көрсетіледі.
– Айша Қарабатырқызы, сонда осы отбасылық дәрігер немесе қазір айтылып жүргендей жалпы тәжірибелі дәрігер деген кім?
– Отбасылық дәрігер немесе жалпы тәжірибелі дәрігер – бұл денсаулық сақтау саласының алғашқы баспалдағындағы маман, ол адам дертін кешенді қарап, тереңде жатқан себебін түсінуге тырысады, яғни, отбасылық дәрігер отбасылық ерекшеліктерді, тұқым қуалау факторын, тегін, әлеуметтік жағдайын зерделейді және балалар мен ересектерді байқау бойынша клиникалық білімге ие.
– Мен бірінші топтағы мүгедекпін. Сіздің орталық арқылы невропатологқа қалай қарала аламын?
– Отбасы дәрігері сізді үйде қарайды, қажет болған жағдайда үйге невропатологты шақыртып алуыңызға болады. Ол үшін қаламыздағы №8 емханаға сейсенбі күндері хабарласуыңыз қажет.
– «Демеу» отбасылық денсаулық орталығында қандай әлеуметтік қызметтер көрсетіледі?
– Қазақстан Республикасының 2008 жылғы «Арнайы әлеуметтік қызметтер туралы» Заңының негізінде және нормативтік құжаттар тұрғысынан біздің орталықта тұрғындарға келесі қызметтер көрсетіледі: әлеуметті маңызды аурулар қатерінің жүріс-тұрыс факторлары мәселесі бойынша жеке кеңес беру, яғни профилактикалық араласу, әңгіме немесе ұсынымдар, денсаулық мектептері, пациент өмірінің әлеуметтік әр алуан қырлары бойынша психоәлеуметтік кеңестер, мінез-құлық желісін өзгерту бойынша түзету және т.б. Сондай-ақ, орталығымызда денсаулық мектептері бар. Онда біздің мамандар әртүрлі топтар бойынша тренингтер ұйымдастырып отырады. Тіпті, біздің орталықта қажет болған жағдайларда кейбір аурулардың үйіне барып, олардың тұрмысымен, әлеуметтік жағдайларымен танысудың мүмкіндіктері қарастырылған.
– Әлеуметтік қызметтерді алу үшін орталыққа аптаның қай күндері және сағат нешеде барғанымыз жөн?
– Күн сайын таңертеңгі сағат 9-дан кешкі 18.00 аралығына дейін тұрғындарға әлеуметтік қызмет көрсетеміз. Ал, күндізгі сағат 14.00 мен 15.00 аралығында түскі үзіліс. Денсаулық мектептері кесте бойынша күн сайын қызмет етеді.
– Ауруыма байланысты менің ауруханаға жатып емделуім қажет еді, бірақ емдеуші дәрігерім көптеген анализдерді тапсыруым керектігін айтып, жолдама жазып берді. Ең қиыны, оларды басқа емханада өтуім керек. Осы анализдерді сіздің емхананың өзінде тапсыруыма болмай ма?
– Денсаулық Министрлігінің №162 бұйрығы бойынша әрбір дәрігер науқасты ауруханаға жатқызар алдында нақтама және емдеу хаттамасына байланысты керекті тексерістерді өткізуі тиіс. Онсыз ауруханаға жатқызылмайды. Өйткені, сырқат адам онда тек емделу үшін жатқызылады.
– Қайырлы күн, Айша Қарабатырқызы! Айтыңызшы, сіздерде мейірбикелер дәрігермен неге қатар отырмайды?
– Біздің «Демеу» медициналық көмек көрсету орталығымызда медициналық бикелер өз бетімен қабылдау жүргізеді, яғни, жеке науқастың әрі халықтың денсаулығына байланысты көптеген мәселелерді мейірбике өз бетімен шеше алады. Бұл дәрігер мен пациенттің уақытын үнемдейді, отбасылық дәрігер қабылдауының құпиялылығы сақталады. Кәсіби жағынан мейірбикелердің талдау және клиникалық ойлау қабілеттері дамиды. Шетелде мейірбике – дербес мамандық және олар жеке қабылдау жүргізеді.
– Аты-жөнім – Сағдат Қарабалаева. Сіздердің мекемелеріңізде профилактикалық екпе жасала ма?
– Иә, біздің орталықта профилактикалық екпелер аптасына бес күн жасалады.
– Сонда қай күндері келуімізге болады?
– Дүйсенбі күні – БЦЖ, сейсенбі, сәрсенбі, бейсенбі күндері – барлық профилактикалық екпелер жасалады. Ал, Манту сынамасын жасату үшін жұма күні келгеніңіз жөн.
– Айша Қарабатырқызы, біз Астанаға жуырда басқа қаладан көшіп келіп едік. Айтыңызшы, сіздің орталықта кішкентай балаларға тегін дәрі-дәрмектер беріле ме ?
– Жақсы, олай болса, алдымен сіз емханаға келіп, балаларыңызды есепке тұрғызуыңыз керек. Қазақстан Республикасы Денсаулық сақтау министрлігінің 04.11.2011 жылғы №786 бұйрығы бойынша 5 жасқа дейінгі, ал диспансерлік есепте тұрған 18 жасқа дейінгі балаларға дәрі-дәрмектер тегін беріледі.
– Сәлеметсіз бе! Мен – жеткіншектің анасымын. Ұлым 14 жаста. Соңғы кезде ол дөрекілік көрсетіп, менің ескертпелеріме құлақ аспайды, мінез-құлқындағы өзгерістерді байқадым. Дер кезінде әрекет етпесем, кеш қалам ба деп алаңдаймын. Сіздің орталықта психолог кеңесін алуыма бола ма?
– Әрине, біздің орталығымызда психологиялық қызмет бар. Сізге сол қызметтің мамандары қажетті көмек көрсете алады. Егер сіз біздің орталығымызда тіркелген болсаңыз, телефон арқылы қабылдауға жазылып, психолог маманның кеңесін тегін ала аласыз. Ол үшін 27-45-15 телефонына хабарласып, маманның қабылдауына жазыласыз. Ал, егер біздің орталыққа тіркелмеген болсаңыз, сізге тек ақылы негізде ғана қызмет көрсетіледі.
– Ақылы және тегін психологиялық қызметтер туралы толығырақ айтып бересіз бе?
– Әрине. Жоғарыда айтқанымдай, орталығымызда тіркеуде тұрған және жасы 24-ке толмағандарға бізде жеке және топтық көмектің барлық түрі тегін көрсетіледі. Қалған тұрғындарға қызметтер ақылы түрде ұсынылады. Сондай-ақ, біздің орталықта «Ер мен әйел», «Бала тәрбиелеу. Қалай?», «Өзіңе-өзің сенімді болып, мақсаттарыңа жету жолы» сияқты көптеген ақылы психологиялық тренингтер өткізіліп тұрады. Жалпы, жеткіншектер 13 жасынан бастап өздігінен психологқа жүгіне алады. Тек 10-ға толмаған балаларға ата-ана рұқсатынсыз психолог кеңес бере алмайды.
Гүлбаршын ӨКЕШҚЫЗЫ