Бейсенбі күні Астана қаласы әкімі Әділбек Жақсыбековтің төрағалығымен Елбасы Нұрсұлтан Назарбаевтың «Нұрлы жол – болашаққа бастар жол» атты Жолдауын талқылауға арналған қала активінің жиыны өтті. Онда елорда әкімі баяндама жасап, (баяндаманың толық нұсқасы газетімізде жарияланып отыр).
Жиында «Нұр Отан» партиясы Астана қалалық филиалы төрағасының бірінші орынбасары Сапар Ахметов, ҚР Парламенті Сенатының депутаты Владимир Редкокашин, Астана қаласы Кәсіпкерлер палатасының директоры Мейірбек Мәжитов, Еуропалық құқық және адам құқықтары сарапшылық институтының директоры Марат Башимов және «Оберег» украиндар қоғамы» қоғамдық бірлестігінің төрағасы Тамара Ширмер ой-пікірлерін ортаға салды.
Сапар АХМЕТОВ, «Нұр Отан» партиясы Астана қалалық филиалы төрағасының бірінші орынбасары:
– Күні кеше барлығымыз Елбасы, партия Төрағасы Нұрсұлтан Назарбаевтың Қазақстан халқына Жолдауының куәсі болдық.
Президент Жолдауы тұңғыш рет «Нұр Отан» партиясының Саяси кеңесі отырысында жария етілді.
Бұл ел Президентінің «Нұр Отан» партиясына деген тегеурінді қолдауы мен терең сенімін білдіреді.
Біз Елбасының биылғы Жолдауын қазіргі геосаяси жағдай мен жаһандық қаржы-экономикалық дағдарысқа қарсы ұсынылған стратегиялық құжат деп қабылдауымыз қажет.
«Нұрлы Жол» жаңа экономикалық Саясаты – осы құжаттың өзегі. Партия Төрағасы атап өткеніндей, экономикамыздың қарқынды дамыған кезеңінде іргесі нығайған Ұлттық қордың табысы алмағайып заманда ел игілігі үшін тиімді қолданылатын болады.
Бұл Жолдау астаналықтар үшін тек саяси жағынан ғана емес, экономикалық тұрғыдан айрықша маңызды. Айбыны артқан Астана алдағы уақытта ішкі бірлік пен бекемдіктің темірқазығына айналып, елордалық жасампаздық пен даму рухы ел аймақтарына серпіліс береді деген сенімдемін.
Осындай ұлы мақсатқа қол жеткізіп, Президент Жолдауын орындау үшін баршамыз бір кісідей атсалысып қызмет жасауымыз қажет.
Келер жыл – Егемендігіміз еңсесін тіктеп, Тәуелсіздіктің тұғыры биіктеп, «Мәңгілік ел» болудың мәнді жолын айқындайтын жауапты кезең. Қазақ хандығының 550 жылдығы, Қазақстан халқы Ассамблеясы мен Конституциямыздың 20 жылдығы, Ұлы Жеңістің 70 жылдығы – қазақстандықтар үшін мерейлі меже.
Владимир РЕДКОКАШИН, Парламент Сенатының депутаты:
– Елбасының Қазақстан халқына Жолдауы ел экономикасын дамытудағы басым бағыттарды айқындап берді. Бұл елдік құжат «Қазақстан – 2050» стратегиялық бағдарламасымен үндес. Мемлекет басшысы кезекті Жолдауын аяқ астынан жария етуінде өзіндік мән бар. Президент өз сөзінде бүкіл әлем жаңа қатерлермен бетпе-бет келіп отырғанын, дүние жүзіндегі экономикалық дағдарыс елімізді де айналып өтпейтінін айтты. Сондықтан, жаһандық дағдарыс қиындықтарының алдын алып, нақты шаралар қабылдау үшін осындай қадам жасалып отыр. Мемлекет басшысы кейбір позицияларды жедел түрде қайта қарап, алдыңғы кезеңдердің жоспарларына түзету енгізу үшін жедел іске кірісу қажеттігін ескертті. Бұл шаралардың барлығы шұғыл қолға алынып, келесі жылдың қаңтарынан бастап жүзеге асырылмақ. Мұны дер кезінде қабылданған дұрыс шешім деуге болады. Дағдарысқа қарсы шаралардың барлығы ең алдымен қазақстандықтардың әл-ауқатын жақсартуды көздейді. Айталық, Президент экономикалық өсім мен жұмыспен қамтуды қолдауға айрықша мән беріп отыр. Үкіметке Ұлттық қордан 500 миллиард теңге көлеміндегі қаржыны шағын және бизнесті несиелеуге, банк секторын сауықтыруға, жаңа инвестициялар тартып, көлік инфрақұрылымын дамытуға жұмсауды тапсырды. Мемлекет басшысы тұрғындарды қолжетімді тұрғын үймен қамтамасыз етуге ерекше тоқталып, ипотекалық несиені барынша төмен пайызбен беруді тапсырды. Міне, осының бәрі еліміздің кез келген қиындықтан сүрінбей өтуге жол салып, әр азаматтың ертеңге деген сенімін нығайтатыны анық.
Мейірбек МӘЖИТОВ, Астана қаласы Кәсіпкерлер палатасының директоры:
Елбасымыздың кезекті Жолдауы – көреген саясатының көрінісі. Жолдауда экономикамызға кері әсер ететін жағдайларды байыптап, дағдарыстың алдын алуға бағытталған тапсырмалар берілді. Біздің 2008 жылғы «дағдарысқа қарсы» тәжірибеміз төнген қауіпке қарсы әрекет ете алатынымызды дәлелдеді.
Жолдауда қарастырылған «Нұрлы жол» жаңа экономикалық саясатта шағын және орта бизнесті дамытуға барынша күш салу керектігі айтылды. Шағын және орта бизнесті және ірі кәсіпкерлікті жеңілдікпен несиелеуге қосымша 100 миллиард теңге бөлінетін болды. Мұнда, әрине, тамақ және химия өнеркәсібіндегі, машина жасаудағы, қызмет көрсетулер саласындағы жобаларды жүзеге асыруға, дамытуға жағдай жасалып отыр.
Бұл бағыттағы жұмыстар қарқын алып, кәсіпкерлікке ден қойғандар күн санап көбейіп келеді. Ағымдағы жылдың шілде айында шағын-орта бизнеспен айналысушылар саны 211 600 адамды құрады, бұл өткен жылмен салыстырғанда 32 000 адамға артқанын көрсетеді. Соңғы тоғыз айда Кәсіпкерлер палатасында кәсібін ашқысы келгендерге бағыт-бағдар беру мақсатында 6577 қызмет көрсетілді.
Шағын және орта бизнес – мемлекеттің экономикалық қозғаушы күші. Сондықтан оның өріс алып, көкжиегінің кеңеюіне, жақсы нәтижелерге қол жеткізуге күш саламыз. Біз Астана қаласы әкімдігімен бірлесіп «Бизнестің даму картасын» жетілдіру үшін жұмыс жасап жатырмыз. Сонымен қатар, шағын және орта бизнес жүргізуге қолайлы ауқымды Индустриялды паркі салынып жатыр.
Жаңа экономикалық саясат еліміздің әлеуетін арттыруға тың серпін береді деп сенім білдіреміз.
Тамара ШИРМЕР, «Оберег» украиндар қоғамы» қоғамдық бірлестігінің төрағасы:
– Елдік құжатта айтылған әр мәселе тұрғындардың әлеуметтік жағдайын ілгерілетуге бағытталған. Тұрғындарды қолжетімді баспанамен қамтамасыз ету, орта және шағын кәсіпкерлікті дамыту, жұмыспен қамту, көлік жол инфрақұрылымын өркендету, бірлікті нығайту – әр азаматтың өмірін мәнді ететін салалар легі. Елбасы мемлекетіміздің алдында үлкен сынақ тұрғанын айтты. Кез келген қиындықтан өту үшін алдымен халықтың бірлігі керек. Президент атап өткендей, біз тұрақтылықты бағалай білгеніміздің арқасында осындай табыстарға жеттік. Кейінгі ұрпаққа аманаттап қалдыратын ең басты байлағымыз да бірлік екенін Елбасы атап өтті. Келесі жылы – Қазақстан халқы ассамблеясының 20 жылдығы аталып өтпек. Бүгінде осынау маңызды шараға әр этнобірлестік ыждаһаттылықпен дайындалып жатыр. Әрқайсысымыз өз жоспарымызды ұсындық. Күллі этнобірлестіктер «Астана – бейбітшілік пен келісім қаласы» атты халықаралық форумға белсенді қатыспақшы.
Марат БАШИМОВ, Еуропалық құқық және адам құқықтары сарапшылық институтының директоры:
– Еліміздің ғана емес, батыстың сарапшылары да Елбасы Жолдауы әлеуметтік міндеттерге де, халықтың әлеуметтік жағдайына да, әлеуметтік құқыларына да кепілдік беріп отырғанын айтып жатыр. Мұндай кепілдікті дағдарыс кезеңінде әлі бірде-бір мемлекет берген емес. Жолдау жүктеген тапсырмалардың ішінде қамтылмай қалғаны жоқ. Әсіресе, халықпен тікелей байланысты салалардың барлығы да жіктеліп, оларды дамытуға нақты міндеттер атап көрсетілді. Мысалы, орта және шағын бизнесті 10 жылға бар-жоғы 6 пайызбен несиелеудің бұрын-соңды болмаған шарты жасалғанын білеміз. Ал шағын кәіпкерлікпен айналысатындардың дені – қарапайым халық. Демек, қазақстандықтарға жасалып отырған мемлекет қолдауы – бұл. «Нұр Отан» партиясы Саяси кеңесінің отырысында Сыбайлас жемқорлыққа қарсы іс-қимылдың 2015-2025 жылдарға арналған бағдарламасы бекітілді. Бұл – кез келген қаржының сұрауы бар деген сөз.
