3 қыркүйек күні V Дүниежүзілік көшпенділер ойындарының қарсаңында «Ұлы дала жорығы» халықаралық марафон бәйгесі басталды.
17 команда таңғы сағат 7:00-де Солтүстік Қазақстан облысы Ботай қонысынан жорықты бастап, 100 шақырым жолды басып Ақмола облысының аумағындағы Лесное елді мекенінде аяқтады. Осылайша жорық басталған бірінші күннің нәтижесі бойынша Қырғызстан командасы жеңімпаз атанды. Жамбыл облысының шабандоздары мәре сызығына екінші болып жетсе, үздік үштікті Алматы қаласының командасы түйіндеді. Жорықтың жол қашықтығы 500 шақырымды құрайды. Басып өтетін бағыт Солтүстік Қазақстан, Ақмола облысы және Астана қаласын қамтиды. Марафон 7 қыркүйекте Астанада аяқталады. Ал жарыстың екінші кезеңі – Лесное ауылынан басталатын жорық Атбасар елді мекеніне барып тоқтайды.
