БОЯУЫ БӨЛЕК «БАЯДЕРКА»
Бүгін елорда жұртшылығы ашық аспан астындағы балетті тамашалайды. Қала күні қарсаңында мұндай ғажап мүмкіндікті «Астана Опера» театры ұсынғалы отыр. Өнерпаздар Людвиг Минкустың әйгілі «Баядерка» спектаклін Тәуелсіздік сарайы алдындағы алаңда сахналамақ.
Естеріңізге салсақ, аталмыш қойылымның Астанадағы премьерасы былтырғы желтоқсанда болған-ды. Ежелгі Үндістанның тыныс-тіршілігімен таныстыратын даңқты драма храм бишісі мен ержүрек сарбаз арасындағы баянсыз махаббат уақиғасын нәзік нотамен, көркем қимылмен әспеттейді. Әдемілігі жағынан «Баядерка» балетін бұрынғы көрсетілімдермен салыстыруға келмес. Өйткені, қойылымға қатысты дүниелердің барлығы танымал италиялық суретші Эцио Фриджерионың қырағы назарынан өткен.
– Жобамыз Тәуелсіздік сарайының архитектурасы мен көркем дизайнына сәйкестендіріліп жасалды. Көрермендер үшін 1400 орны бар үш деңгейлі алаң дайындаймыз. Сонымен қатар, шымылдық артында тропикалық джунглидегідей салтанатты сарайлар мен зәулім ғибадатханалар бой көтереді. Спектакль соңына таман балериналар көлеңке арқылы билеп, бұқараға бөлекше әсер сыйлайды. Ал 20-дан аса проектордың көмегімен көрсетілетін бейнелер Тәуелсіздік сарайы ғимаратының төбесін тұтастай қамтиды, – дейді «Астана Опера» театрының көркемдік қойылым кешені жетекшісі Виктор Караре.
Әртістердің киімдеріне де «әңгіме айта алмайсыз». Бұл тарапты толықтай бақылауына әлемдік деңгейдегі атақты костюмер Франка Скуарчапино алған. Балет бишілеріне арналған 133 костюм театрда тігілсе, 84-і Италияда әзірленіпті. Мата Үндістаннан, киімге тағылатын әшекейлер Дубайдан әкелінген. Құнды бижутериямен көмкеріліп, қымбат жіппен кестеленген көйлектер шығыстық сән-салтанатты барынша айшықтайды.
Қойылымға театрдағы балет труппасы тегіс қатысады. Мамандар «Баядерканы» кордебалеттің ең үздік триумфі ретінде бағалағанын ескерсек, жоғарыдағы жайттың өзі шығармашылық құрамның кәсіби тұрғыдағы жетістігі екенін аңғарамыз. Басты партияларды отандық балеттің жарық жұлдыздары, «Астана Опера» театрының жетекші солистері, Қазақстанның еңбек сіңірген қайраткерлері Мәдина Баспаева (Никия), Тайыр Гатауов (Солор) және Гауһар Усина (Гамзатти) орындайды. Осы орайда спектакльдің қоюшы хореографы Алтынай Асылмұратованың ойын білмек болғанбыз.
– Ұстазым Ольга Моисеева бұл спектакльді жан-тәнімен жақсы көрді, менің де қаныма сол махаббатты сіңдірді. «Баядеркадағы» Никия партиясына келсек, мұнда бір-біріне ұқсамайтын екі балетті байқаймыз. Бірінші және екінші актілер – эмоцияға толы, актерлік шеберлікті талап ететін бөлім. Техникалық қиындықтары да көп. Соңғы актіде – таза классика. Ашық аспан астында билеудің бір кереметі – еркіндікті сезінетіндігінде, – деді ол.
Айтпақшы, спектакль кезінде ауа райының жауын-шашынсыз болуы да аса маңызды. Себебі, еден ылғалданса, оның үстінде балет билеу мүмкін емес. Ендеше, бұл күні табиғаттың өзі елордалықтардың ерекше балет көруіне көмектесер деген үміттеміз.
Ботагөз МАРАТҚЫЗЫ