Кеше Астана қаласындағы «Ауғанстан соғысында қаза тапқан қазақстандық жауынгерлер мемориалы» ескерткіші алдында Кеңес әскерінің Ауғанстан аумағына кіргеніне 33 толуына орай митинг өтті.
Алдымен жауынгер-интернационалистер мешіт пен шіркеуде болып, соғыс даласында қаза болған майдандас достарының рухына құран бағыштау рәсіміне қатысты. Ескерткіш алдындағы митингке жауынгер-интернационалистер, соғыста қаза болған жауынгерлердің ата-аналары, мемлекеттік және қоғамдық ұйымдардың өкілдері, әскерилер мен студенттер қатысты.
Митингке жиналған қауым алдында Ауғанстан соғысының ардагерлері генерал-майор Әлімжан Ерниязов, Мәжіліс депутаты, Ауғанстан соғысы ардагерлері ұйымдарының «Қазақстан ардагерлері» қауымдастығының төрағасы Бақытбек Смағұл, Астана қаласының «Ауғанстан соғысы мүгедектері мен ардагерлері одағы» ҚБ төрағасы Мұратбек Әміржанов сөз сөйлеп, соғыс кезінде қаза болған қазақстандықтардың ерлігін атап өтті.
Боздақтарды еске алу шарасы ескерткішке гүл шоқтарын қою рәсімімен аяқталды.
Балкен ҚАСЕНОВА
