БРУНЕЛ УНИВЕРСИТЕТІНДЕГІ БІЛГЕН-ТҮЙГЕНДЕРІМ
Бүгінгі таңда өскелең ұрпақты тәрбиелеу – ата-ананың, қоғамның және ең бастысы ұcтаздардың еншісінде. Сапалы білім беру мәселесі тек қана білім беру саласын емес, бүкіл елді алаңдатады. Себебі болашақтың жарқын болуы бүгінгі білім жүйесінің мықтылығымен анықталады.
Жаңа заман талабына сай болу үшін талпыныс керек. Мен де көптеген әріптестерімдей, Елбасы тағайындаған «Болашақ» халықаралық бағдарламасына қатысып, Лондон қаласындағы Брунел университетінде білімімді жетілдіріп, тәжірибеден өту мүмкіндігіне ие болдым. Мұнда Қазақстанның түкпір-түкпірінен жиналған оқытушылар инновациялық білім беру технологиясы және оқу тәжірибиесін жақсарту бағдарламасы бойынша біліктерін арттыруда. Бағдарлама оқу процесін ұйымдастыру, басқару, білім беру әдістері, студенттермен жұмыс істеу, өздігінен білім алуды жетілдіру, кәсіби даму, білім беру стретегиясы, зерттеу жұмысын жүргізу, мақала жазу және шетелдік басылымдарда шығару сияқты бірнеше бағытты қамтиды. Оқу барысында түрлі экскурсиялар да ұйымдастырылады.
Брунел – халықаралық деңгейдегі, Лондонның батысында орналасқан көне университет. Ол ХІХ ғасырдағы өнеркәсіп революциясының басты тұлғасының бірі, жаңашыл, ғалым, инженер Изамбард Брунелдің атымен аталады. Университет жанындағы бизнес мектеп өткен жылы «Ең үздік бизнес мектебі» атағын жеңіп алған. Әрине, ағылшындардан үйренеріміз әлі де көп. Дегенмен, ерекше мән беріп, ой түйген артықшылықтарына тоқтала кетелік.
Ұлыбритания университеттерінде сабаққа қатысу міндетті емес. Бұл елде студенттер өз еркімен білім алатын ізденімпаз, өз бетінше шешім шығара алатын, өз болашағына жауап бере алатындай болуы тиіс. Студенттерге бағыт беру үшін оқытушылар да ұдайы ізденісте болуы керек. Қазіргі уақытта ғаламтор арқылы барлық саладағы ақпараттарға қол жеткізуге болады. Әркім ғылымның, техниканың, мәдениеттің, саяси өмірдің қандай да бір саласынан жүйелі түрде таным көкжиегін кеңейтетін болса, оны орнымен қолдана білетін болса көп нәрсеге қол жеткізеді. Өкінішке қарай, саналы түрде білім алу, оны шығармашылық деңгейде іске асыру көп адамның қолынан келе бермейді. Сол себепті, білімді басқару мәселесі қазіргі уақытта көптеген ғалымдарды ойландыруда.
Жаңашыл педагогикалық әдістерді үйрену біздің Англиядағы күндеріміздің мәнін ашты десек болады. Университеттің ерекшелігі тек қана академиялық білім беріп қана қоймай, студенттерді бизнес өмірге бейімдейді. «Business life» бағдарламасы жастарды жұмысқа машықтандыру үшін әрі қазіргі кездегі кәсіпорындар сұранысына негізделіп жасалған бағдарлама. Оған студенттер қалауы бойынша тіркеледі. Коммуникация, яғни өз ойын еркін жеткізу, топпен жұмыс істеу, талдау мен зерттеу, шешім шығару, өз іс-әрекетін жоспарлау, жаңа өзгерістерге тез бейімделу секілді қабілеттерді ұштайтын арнайы іс-шаралар ұйымдастырады, ірі кәсіпорындардан мамандар келіп ой-пікірлерімен алмасады.
Тағы да бір ойландыратын мәселе – студенттердің жұмысын бағалау әдісі. Бұл университетте әр пәннің емтиханын тексеруге пән оқытушысынан бөлек, тағы да бір оқытушы тағайындалады. Орын алған олқылықтар болса, бірлесе отырып шешеді. Шаруа мұнымен түгесілмейді. Бұдан кейін жұмыстарды алдын ала тағайындалған топ тексереді. Сөйтіп, бірнеше тексерістен өткеннен кейін ғана соңғы нақты бағасы анықталады. Бұл өз кезегінде студенттер жұмысын тексергенде әділдікке, жан жақты бағалауға мүмкіндік береді және келісіп пішкен шешімге студенттер тарапынан да көп уәж туындамайды.
Тағы бір таңғалатыны, университетте «feedback», яғни кері байланыс өте жақсы жолға қойылған. Студенттердің барлық жұмыстарына ауызша немесе жазбаша кері байланыс беріледі. Егер қателіктері болса айтылады, өте жақсы жасалған жұмыстар да талқыланады. Ол студентерге өз жұмыстарының жақсы жақтарын анықтауға, оны әрі қарай дамытуға мүмкіндік береді. Яғни, студенттер оқытушылардың қаншалықты кәсіби маман екенін біледі.
Тағылымдама барысында әр түрлі білім беру техникасы мен әдістерін де меңгеріп жатырмыз.Алған тәжірибиемізді өзіміздің әріптестерімізбен бөлісіп, ұлттық ерекшелігімізге қарай жетілдіре бермекпіз.
Әмина УАЙСОВА,
Абылайхан атындағы Халықаралық қатынас және әлем тілдері университетінің аға оқытушысы, «Болашақ» стипендианты