БҰЛ КҮНІ СПОРТПЕН ӘР АДАМ ШҰҒЫЛДАНА АЛАДЫ
Бүгін және ертең елімізде спортсүйер бұқара Қазақстан Республикасындағы Олимпиада күнін атап өтеді. Біз осы айтулы спорттық мереке қарсаңында Ұлттық олимпиадалық комитеті Астана қалалық бөлімшесінің төрағасы, Астанадағы «Дәулет» спорт комбинаты» МКҚК кешенінің директоры Қуандық Елжановты әңгімеге тарттық.
– Дәстүрлі Олимпиада күнін атап өтуге биыл алдын ала қолға алынған дайындық шараларын атап өтсеңіз…
– Мысалы, биыл салтанатты ашылу рәсімі «Астана-Бәйтерек» монументінің алдында өтетін елордамыздың олимпиадалық стартына 5 мыңдай адамның қатысуы жоспарланған. Арнайы бағдарламаға әртүрлі қашықтықтағы жүгі-рістер, асфальт үстіндегі балалар суреттерінің байқауы, Қысқы Олимпиадалық ойындардан викторина және басқа да жарыстар енді. Сондықтан осы екі күнді мерекелеуге жүгіріс пен өзге спорттық сайыстарда өз күшін байқағысы келген әр жастағы ерікті адамның барлығы да қатыса алады. Ол үшін Астана қаласында әртүрлі жас топтарына арналған жеке жүгірістер, мазмұнды спорттық бағдарламалар ұйымдастырылды.
– Ал, жарыс жеңімпаздары қандай жүлделермен марапатталады?
– Оларға Ұлттық Олимпиадалық комитетінің естелік сыйлықтары, жарыс демеушілерінің жүлделері және Әлемдік Олимпиада күнінің символикасы бар майкалар табысталады. Сондай-ақ, әрқайсысы Халықаралық Олимпиада күнінің президенті Жаке Роггенің қолтаңбасы жазылған Олимпиада күніне қатысушының сертификатын алады. Тағы бір мақтана алатын ерекшелігіміз – Қазақстандағы Олимпиада күні қалыптасқан дәстүр бойынша басқа елдерден ерте, яғни 19 мамыр күні өткізілетіндігі.
– Бұл жолғы сіздермен серіктестер қатарында қай мекемелер бар?
– Біздің серіктестер – 2003 жылы құрылған корейлік «Allur Auto» мен «Ssang Yong» компаниялары, TASSAY сауда маркасы және «Альянсстройинвест» ЖШС. Негізінде, өзіміздің «Самұрық Қазына» ҰӘҚ» АҚ бас серіктес болып отыр.
Е.БОЛАТҰЛЫ