«Бұрқасында» буырқанып, бұрсанып…
Өткен жексенбі күні Есіл өзенінде қысқы спорт түрінен өткізілетін жылдың соңғы жарысы – «Бұрқасын-2013» шаңғы фестивалі өтті. 2000 жылдан бері үзбей өткізіліп келе жатқан спорт сайысына 1900-дей салауатты өмір салтын ұстанушы қала тұрғыны қатысып, 2400-ге тарта көрермен жиналды.
Астана қаласының Туризм, дене тәрбиесі және спорт басқармасы ұйымдастыратын дәстүрлі шара аясында шаңғы жарысынан, хоккейден, шағын футболдан, мұз- асты балық аулаудан, кір тасын көтеруден, армреслингтен, белбеу күресінен, арқан тартысынан жарыстар өтті. Бұл жарыстарға спортшы балалар, ересектер, күш құрылымдары, ардагерлер, жұмыс ұжымдары санаттарына бөлініп қатысты.
Шаңғы жарысы бойынша ардагер ерлер арасындағы (5км) жарыста Оперсал Аллан, әйелдер арасындағы жарыста (3км) Қазиханова Сауле 1-інші орынды иеленді. ҚР Ұлттық гвардия сарбаздары ішінен осы сында (5 км) Керімбаев Қуат бірінші келсе, күш құрылымдары тобынан Руслан Қожаев қарсыластарын қапы қалдырды. Осы күш құрылымдары тобындағы қыздар арасында болған сайыста Иманғажина Света есімді Төтенше жағдайлар департаментінің қызметкері топ бастады.
Сонымен қатар, 3 шақырымға созылған бұқаралық шаңғы жарысында ерлер арасынан Бекебаев Андрей және қыздар ішінен Абдуахитова Әлия озып келді. Осындай жарыс оқушылар арасында болып, 1999-2000 жылы туылған ұлдардан Зинекешов Решат, қыздардан Зуева Виолета бірінші орынға ие болды.
Шағын футболдан «Асу» командасы – 1-ші, №61 мектеп командасы – 2-ші, №58 мектеп командасы 3-ші орынды еншіледі. Ал, 16 кг кір тасын көтерген жігіттердің ішінен Асанов Ғалымжан білекті шықса, 24 кг кірді көтеріп жарысқандар ортасынан Чирнык Роман бас жүлдеге лайық деп табылды.
Армреслинг сайысынан 60 келі салмаққа дейінгілерден Қатжанов Рауан, 60 келіден жоғарғы салмақ иелері арасынан Кәрібаев Абзал басқаларынан басым түсті. Сондай-ақ, «Белбеу күресінен» де тартысты бәсеке болып, жастар арасынан Аяпбергенов Серікболсын және жасөспірімдерден Әкімжан Жасұлан ең белді палуан атанды.
Мұзасты балық аулау жарысына қатысушылар басқа спорт түрлеріне қарағанда аз болды. Бұл сыннан ең жақсы көрсеткіш көрсеткен – Фролов Сергей. Ал, хоккейден «Столичные бойцы» командасы ешкімді шақ келтірмеді. Жарыстың соңғы түрі арқан тартысы бойынша «Арлан» командасы да ешбір командаға дес бермеді.
Ербол ЖАНАТ