Елорда әкімдігінің сайтында Bus Lane-де жеке автокөліктердің қарбалас уақыттан тыс және демалыс күндері жүру мәселесі бойынша наурыз айының басында дауыс беру өтті.
Онлайн-дауыс беруге 706 адам қатысты, респонденттердің 58 пайызы елорда жолдарында көлік нөпіріне алып келеді деп санайды, ал 41 пайызы бұл бастамаға қолдау білдірген.
«Қаладағы кептеліс таңертеңгі сағат 7:30-дан басталып, 10:00-ге дейін созылуы мүмкін, сол сияқты аралық уақыт бар, түскі уақытта кейде 13:00-ден 14:00-ге дейін көлік көп жүреді. Негізгі қарбалас шақ – кешкі уақытта, кейбір учаскелерде 3-4 сағатқа дейін созылады, ол шамамен 18:00-ден басталып, 21:00-ге дейін жалғасуы мүмкін» дейді «CTS» көлік компаниясы жол қозғалысын ұйымдастыру бағытының жетекшісі Думан Ысқақов.
Елордада Bus Lane арнайы бөлінген жолағының жалпы ұзындығы 73,6 км көшенің 26 учаскесінде енгізілген.
