Қалалық мәслихаттың 44-ші кезектен тыс сессиясында Астананың 2014-2016 жылдарға арналған бюджетіне өзгерістер енгізу туралы мәселе талқыланды.
Осыған орай, Экономика және бюджеттік жоспарлау басқармасының басшысы Ж.Нұрпейісов Бюджет кодексіне 2014 жылғы 4 тамызда енгізілген өзгерістерге сәйкес, республикалық бюджеттің нақтылануы кезінде жергілікті деңгейде түзету кіргізіліп, биылғы республикалық бюджеттің нақтылануы қала бюджетінің түзетілуімен қабылданғанын жеткізді.
Басқарма басшысының айтуынша, қаланың әлеуметтік-экономикалық көрсеткіштерінің өсу серпіні бюджеттің кіріс бөлігінің атқарылуына оңтайлы әсер етті. Осыған байланысты Астана қаласы бюджетінің кіріс бөлігі 2,8 млрд теңгеге ұлғайды. Өткізілген мониторингке сәйкес, бюджеттік бағдарлама әкімшілерінің ұсыныстары бойынша қаражатты қайта бөлу ұсынылды.
– Осылайша, 2014 жылдың қаңтар-қазанында қала бюджетіне 129 645 789 мың теңге түсті, өткен жылдың тиісті кезеңімен салыстырғанда түсім 19 876 710 мың теңгеге ұлғайды, оның ішінде салықтық түсімдер бойынша нақты түсім 113 661 571,0 мың теңгені құрады, өткен жылдың тиісті кезеңімен салыстырғанда түсімдер 18 789 406,0 мың теңгеге ұлғайды, – деді Ж.Нұрпейісов.
Бас қаланың Алматы ауданының шығыстарына 200 млн теңге қарастырылды, оның 25 млн теңгесі аудан аумағындағы елдi мекендердiң көшелерiн жарықтандыруға және 175 млн теңгесі тазалық жұмыстарын қамтамасыз етуге жұмсалмақшы. Сонымен бірге, Сарыарқа ауданына 250 млн және Есіл ауданына 350 млн теңге қарастыру көзделген.
Одан әрі елорданың Энергетика, Құрылыс, Коммуналдық шаруашылық, Табиғи ресурстар және табиғатты пайдалануды реттеу басқармаларына қосымша қаржы бөлінгенін, бұл қаражат білім, денсаулық сақтау, әлеуметтік қорғау, мәдениет салаларындағы кезек күттірмейтін бірқатар міндеттерді шешуге бағытталатынын айта келе, Жанат Ғазизұлы, сондай-ақ, жол қозғалысы қауіпсіздігін қамтамасыз ету үшін көлік инфрақұрылымын дамытуға және жаңа автобустар сатып алуға, тұрғын үй-коммуналдық шаруашылық саласын дамытуға да қаражат қарастырылғанын, ол қаланың тазалығына, аулаларды абаттандыру мен көшелерді жарықтандыруға жіберілетінін жеткізді.
Қалалық мәслихаттың депутаттары Астана қаласының 2014 жылғы бюджетіне енгізілген өзгерістерді бірауыздан бекітті.
Сессия барысында мемлекет мұқтажы үшін жер учаскелерін алуға байланысты жер учаскелерін немесе жылжымайтын өзге мүліктерді сатып алу туралы шарттардың жобалары келісілді.
