Астанадағы Қадыр Мырза Әлі атындағы Binom School мектеп-лицейінде көрнекті ақын, Қазақстанның халық жазушысы, Мемлекеттік сыйлықтың лауреаты Қадыр Мырза Әлінің туғанына 90 жыл толуына орай «Даналықпен дараланған ақын әлемі» атты мастермайнд өтті.
Іс-шара барысында «Ғылымға жақын бір қадам» атауымен STEM лаборатория бағыты бойынша көрме, «Жарқын болашаққа – Қадыр мұрасымен» атты виртуалды әуе саяхаты, «Өлең сөздің зергері – қазақтың Қадыры» атты шығармашылық сағаты ұйымдастырылды. Секциялық жұмыстар аясында «Инновациядан – интеграцияға» тақырыбында функционалды сауаттылыққа бағытталған шеберлік сабақтары, workshop т.б. іс-шаралар өтті.
Ақынның туған жері Батыс Қазақстан облысы, Сырым ауданындағы Қадыр Мырзалиев атындағы жалпы орта білім беретін мектеп және Орал қаласындағы Қадыр Мырза Әлі атындағы мәдени орталықтың қатысуымен телекөпір ұйымдастырылды. Оқушылар Қадыр Мырза Әлі өлеңдерін оқып, қанатты сөздерге айналған шумақтарына тоқталды. Ұстаздар ақынның жырларына жазылған әндерді орындады. Қадыр Мырза Әлінің мұрағаттан алынған өз дауысымен оқылған өлеңдері тыңдалды. Іс-шара соңында мектептің әнұранына айналған Қадыр Мырза Әлінің өлеңіне жазылған Ескендір Хасанғалиевтің «Атамекен» әні орындалды.
Аманғали Қалжанов
