«Нұр Отан» ХДП Астана қалалық филиалының ұйымдастыруымен өтіп жатқан «Мектепке жол» акциясына халық қалаулылары да үн қосуда. Осылайша, жаңа оқу жылы қарсаңында қалалық мәслихат депутаты Есенжол Бекішев №4 қазақ мектеп-гимназиясының оқушыларына демеушілік көмек көрсетті.
Дәстүрге айналған қайырымдылық шара барысында әлеуметтік жағдайы төмен, аз қамтылған және көпбалалы отбасылардың балалары мектепке қажетті құрал-жабдықтармен қамтамасыз етілді. Мәселен, Мирас пен Олжас Секербаевтар, Диас пен Гүлнұр Әкбаровтар жалғызілікті ананың балалары болса, Дана мен Дина Жәнібековалар, Нұржан Әбілдин мен Құралай Нұрғожина аз қамтылған отбасында тәрбиеленіп жатыр. Ал, Әйгерім мен Файнұр Ерғалиевалар – тағдырдың тауқыметін тартқан жетімдер. Олардың жаңа оқу жылына қажетті барлық нәрсені бірдей сатып ала алмайтындықтары белгілі. Осыны ескерген халық қалаулысы өз округіндегі мектеп оқушыларын орталықтағы «Артем» сауда үйіне ертіп апарып, өздері ұнатқан оқу құралдары мен спорт киімдерін, волейбол добын сатып алуға мүмкіндік туғызды.
Дана мен Дина «Мектепке жол» акциясына биыл бірінші рет қатысып отыр. Екеуі де оқу озаты. Отбасында олардан басқа тағы екі кішкентай бар. Олардың әжесі Жұмакүл Әлімқұлова өз күштерімен балаларды сабаққа дайындай алмайтындарын, бүгінде бір баланың өзін киіндіру оңай емес екенін айтып, қамқорлыққа зәру балаларға жәрдемдесіп, немерелеріне оқу құралдарын сатып алып беріп жатқаны үшін Есенжол Түскенұлына ризашылығын білдірді.
Ал, №4 қазақ мектеп-гимназиясының 9«ә» сыныбында оқитын Әйгерім Ерғалиева аталмыш акция аясында бұрын да осындай көмек алған екен. Өзі әжесінің қолында тұратын ол жалғыз асыраушысының мардымсыз зейнетақысы мектепке қажетті, өзіне ұнаған заттарды сатып алуына жетіңкіремейтінін, сондықтан кез келген бір зат сатып аларда алдымен оның бағасына қарайтынын, ал бүгін тек өзіне ұнайтындарын таңдап алып жүргенін жасырмады. Қайырымды жанның қамқорлығы арқасында әдемі рюкзактарды асынып, оның ішін өздерінің сүйікті оқу құралдарына толтырған балақайлардың қуанышында шек жоқ. Жүздері бал-бұл жанып тұр. Депутат ағалары сатып әперген заттарды бір-біріне көрсетіп мәз. Қамкөңіл балақайлардың қуаныштары ұзағынан болғай!
Гүлбаршын ӨКЕШҚЫЗЫ
