ДЕМОКРАТИЯНЫҢ ЕҢ ЖОҒАРҒЫ МЕКТЕБІ
Конституция мемлекеттік биліктің қайнар көзі халықтың өзі екендігін айқындады. Жаңа Конституция қабылдау арқылы Қазақстан жаңа дәуірге қадам басты. Міне, осы мерейлі межеге биыл 19 жыл толып отыр. Жыл сайын бұл мемлекеттік мерекені атап өту – Негізгі заңға деген құрметімізбен қатар, өзіміздің таңдауымызға, өзімізге деген құрмет.
Қоғамдық татулық пен саяси тұрақтылықты сақтап, еліміздің әрбір азаматының бақытты өмір сүруін қамтамасыз ететін Ата заң – елдің қорғаны. Негізгі заңда барша қазақстандықтарға түсінікті де етене ортақ құндылықтар нақты заң тілімен баяндалған. Халықтың бірлігі – бұл ең алдымен мемлекеттік институттардың бірлігі. Алтын заңымыздың 34-бабында: «Әркім Қазақстан Республикасының Конституциясын және заңдарын сақтауды, басқа адамдардың құқықтарын, бостандықтарын, абырой мен ар-намысын құрметтеуге міндетті» деп көрсетілген. Өзінің құқықтары мен бостандықтары Ата заңмен қорғалатындығын және ол мемлекеттің мүддесінен шығып отырған дүние екендігін әрбір ел азаматы бес саусақтай білуі тиіс. Өйткені, адамның өз құқыларын білуі және оны қажетті жерде қорғай алуы, яғни, құқықтық сауаттылықтың болуы – зайырлы қоғамның басты талаптарының бірі.
Мемлекетіміздің Конституциясы қоғамның дамуы үшін жағдайлар жасап қана қоймай, елімізде тату-тәтті өмір сүріп жатқан барлық этнос өкілдері үшін тең құқық берді. Осы орайда, Ұлт көшбасшысы Н.Назарбаевтың құқықтық мемлекет құрудағы ерен еңбегін атап айту керек. Ата заңымыздың әрбір бабы көз қарашығындай сақталып, мүлтіксіз орындалуына ел Президенті кепіл болып келеді. «Конституцияны қатаң ұстану – бұл мемлекеттіліктің табысты дамуының және қоғамдағы азаматтық келісімнің негізі. Ол бойынша өмір сүру – бұл демократияның ең жоғарғы мектебі. Бұл мектептен барлығымыз өтуге тиіспіз. Біздің міндет – Конституцияға аса ұқыптылықпен қарау. Өзіміздің елімізді, өзіміздің тарихымызды, өзіміздің жетістіктерімізді қалай құрметтесек, оны да солай аялауымыз керек. Конституцияны сыйлай білмесек, оның талаптарын мүлтіксіз орындай алмасақ, онда қоғамдық келісімге, тәртіпке, бейбітшілікке және тыныштыққа жету мүмкін болмайды, яғни мұндай жағдайда Отанның ырыс-берекелі болашағы туралы айтудың да қажеті жоқ» деген тұңғыш Президентіміз.
Ғасырлар бойы қалыптасқан адамзат баласының жалпы құндылықтарын өз бойына сіңірген Конституциямызда адамдардың табиғи құқылары мен бостандықтары, билік институттарын демократиялық жолмен қалыптастыру және дамыту, Қазақстан аумағында азаматтық қоғам құру туралы дүниежүзі таныған прогрессивті идеялар бекітілді. Сол арқылы еліміздің барлық азаматтарының бірлесіп, бір жеңнен қол, бір жағадан бас шығарып қызмет етулері үшін жағдайлар жасалды.
Бүгінгі таңда біз әлеуметтік-экономикалық, құқықтық және саяси өмірдегі реформаларды жүргізуде Конституция нормалары мен принциптерінің дұрыстығына көз жеткізіп отырмыз. Бұлай дейтінім, әлгінде атап өткенімдей, небір алмағайып заманды бастан кешірген бабаларымыз ұрпағының тәуелсіздігі жолында қасықтай қанын төгіп, шыбындай жанын беріп, еш аянған жоқ. Олар елі азат, жері тұтас қуатты мемлекет құруды, Жерұйықта ғұмыр кешуді аңсады.
Аумағы ұшқан құстың қанатымен, жер апшысы қуырған тұлпар тұяғының дүбірімен өлшенген кең де келісті өлкені мекендеген қазақ халқының егемендігінің кепілдігі іспеттес Конституциямыз өміршең болып, Көк туымыз көкте желбірей берсін!
Қанат МУСИН,
Астана қаласы Әділет департаментінің басшысы