Адам баласы үшін денсаулық – баға жетпес асыл қазына. Елордадағы «MEGA Silk Way» орталығында «Біз денсаулықты қолдаймыз!» атты жиын өтті.
Іс-шара барысында қала тұрғындары мен қонақтары терапевт, педиатр секілді түрлі дәрігерлерден денсаулығына қатысты кеңес алды. Бұған қоса, қан қысымы, оның құрамындағы қант көрсеткіші, холестерин деңгейі тексерілді. Сол сияқты флюорографиядан өткісі келген жандар үшін флюорокөлік қызметі арқылы тегін көмек көрсетілді.
Ал жедел жәрдем мамандары адам өміріне қауіп төнгенде алғашқы көмек қалай көрсетілетіні туралы шеберлік сабағын өткізді. Іс-шара концерттік бағдарламамен, сондай-ақ әлеуметтік медициналық сақтандыру тақырыбындағы викториналармен жалғасты. Ал белсенді қатысушыларға түрлі сыйлықтар тарту етілді.
Сауықтыру шарасын елордалық Қоғамдық денсаулық сақтау басқармасы Әлеуметтік медициналық сақтандыру қоры және Денсаулық сақтау министрлігінің МӘМС бойынша жобалық кеңсесімен бірлесе отырып өткізді.
