ДЕНІ САУДЫҢ – ЖАНЫ САУ
Жыл сайын «Астанаэнергосервис» АҚ ұйымдастыруымен коммуналдық шаруашылық қызметкерлері арасында ашық Спартакиада тұрақты өтіп тұрады.
Биылғы жылы ел Тәуелсіздігінің 25 жылдығына арналған сайысқа «Астанаэнергосервис», «Астана-Теплотранзит», «Астана-Энергия», «Астана-РЭК» акционерлік қоғамдары мен «Астанастройэнерго», «Астана қалалық жарық» ЖШС және «Астана су арнасы» мемлекеттік коммуналды кәсіпорны атынан 7 команда қатысып отыр. Команда мүшелері волейбол, мини-футбол, үстел теннисі, шахмат, дойбы, бильярд сияқты спорт түрлерінен бәсекелесіп, сонымен бірге қысқы балық аулаумен де жарысқа түспек. Спартакиада 14 желтоқсанға дейін жалғасады. Астана қаласы мәслихат депутаты Еркеғали Есенжолов спорт шарасын өткізу бойынша ұйымдастыру комитетінің төрағасы болып табылады. Жастар арасындағы спорт жарысы биылғы қыркүйекте №25 сайлау округі бойынша да 12 мектеп оқушыларының қатысуымен өткен еді. Жарыс мәслихат депутатының сайлау округі болып табылатын «Интернациональный» тұрғын алабындағы №44 мектепте өтті. Жарыс қорытындысында жеңімпаз өрендерге 9 кубок пен 40 медаль және 40 алғыс хаттар табыс етілді.
Осы округтің тұрғындары арасында да үстел теннисінен өткен турнирге 12 ардагер қатысып, бірінші орынды ерлер арасында Т.Маденов алса, әйелдер арасынан М.Қаракөзова жеңіп шықты. Жеңімпаздарға бағалы сыйлықтар беріліп, ең бастысы, салауатты өмір салтын насихаттауға атсалысқан азаматтарға депутат өз атынан алғыс білдірді.
Айгүл УАЙСОВА