Дерт дес бермей тұр
Қаңтар айының басынан бері елордада 72 мыңнан астам адам індет жұқтырған.
Қаланың бас мемлекеттік санитарлық дәрігері Сархат Бейсенованың мәліметінше, елордада тәулігіне 2852 адамнан COVID-19 анықталған. Қаңтар айының алғашқы күнінен 27-сіне дейін 72017 ауру тіркелді, бұл – ел бойынша тіркелген жағдайдың 44,6 пайызы. COVID-19 барлық жағдайда адам денсаулығына, әсіресе вакцинациядан өтпеген адамдарға ұзақ уақыт кері әсер ететінін ескерген жөн.
«Коронавирус инфекциясы – өте қауіпті ауру. Постковид синдромы үш айдан бір жылға дейін созылуы мүмкін. Сонымен қатар COVID-19-дың жеңіл түрімен ауыратын науқастардың да иммунитеті қатты зардап шегеді. «Омикрон» «Дельтаға» қарағанда жеті есе жұқпалы екенін ескерсек, халықтың едәуір үлкен тобында иммунитет нашарлайтынын білу керек» делінген елорданың санитарлық дәрігерінің хабарламасында.