Дін дүрдараздық тудырмауға тиіс
Мемлекет басшысы Н.Назарбаевтың «Қазақстан — 2050» стратегиясы: қалыптасқан мемлекеттің жаңа саяси бағыты» атты халыққа арнаған Жолдауы еліміздің стратегиялық басымдықтарын айқындап, мақсатты межеге жетудің механизмдерін түзетін маңызды құжатқа айналып үлгерді.
1997 жылы қабылданған «Қазақстан – 2030» стратегиялық бағдарламасы еліміздің аталған уақыт аралығында қандай межеге жететінін көрсеткен болатын. Қажырлы еңбек пен дұрыс ойластырылған жоспар нәтижесінде мемлекетіміз 2012 жылдың өзінде-ақ алға қойған асуды бағындырып, еліміздің 2050 жылға арналған жоспарын белгілеп алды.
Президентіміздің 2050 жылы Қазақстанды әлемнің экономикасы дамыған 30 елінің қатарына енгізуді бағдар еткен кезекті жолдауы өзекті саланың ешбірін айналып өтпеді. Оның бірі – дін саласы. Ханафи мәзһабының қазақ халқының тарихындағы рөлін ерекше атап көрсеткен Елбасымыз азаматтарды дәстүрді мансұқ ететін радикалды ағымдардан абай болуға шақырды. Шынында да, дінді саясиландыру арқылы адамдар арасында дүрдараздық тудыру, дін ілімдерін бұрмалау жолымен азаматтарды мемлекетке, дәстүрге, туған-туыстарына қарсы қою ешбір дінде құпталған емес. Біз саналы азамат ретінде мұндай қауіп-қатерге жол бермеуге тиіспіз.
Қорыта айтқанда, бұл Жолдау, ел тұрғындарының мақсат-мүддесіне арналып, халықтық кең қолдауға ие болып отыр.
Ж. ДӘУРЕНОВ,
Астана қаласы Дін істері
департаментінің директоры