Динара Сәдуақасова – Әлем чемпионы
Елордалық шахматшы Динара Сәдуақасова Үндістанның Бхубанесвар қаласында өткен жастар арасындағы әлем чемпионатында топ жарды. Бұл зияткерлік сайысында 57 шахматшы бас жүлде үшін бас қатырды
Әлем біріншілігінде Динара 13-тен 9,5 ұпай жинап, көш бастады. Ал одан кейінгі орынға ресейлік, үшінші орынға үндістандық шахматшы лайық болды.
Швейцариялық жүйе бойынша ұйымдастырылған жарыста 13 түр өткізілді. Екі аптаға созылған сайыста үздік болған Динара енді әйелдер арасындағы әлем біріншілігінде сынға түседі.
Елордалық жас талант Х.С. Омаров атындағы шахмат клубында бес жасынан бастап тәлім алып жүр. Динара шахматпен қатар музыка мектебінің фортепиано сыныбын үздік аяқтап, көркемдік гимнастикамен шұғылданған. Шахматқа біржола бет бұрған ол сегіз жасында әлемдік деңгейдегі жарыста топ жарады. Динара Сәдуақасова үш дүркін әлем чемпионы, Азияның үш дүркін вице-чемпионы және Қазақстан чемпионатының бірнеше дүркін жеңімпазы.
Айтпақшы, Динара 2014 жылы өзінің шәкіртақысына «Шахматтағы алғашқы қадамдар» атты әдістемелік кітабын шығарды. Бұл – шахмат үйренгісі келетін жеткіншектерге таптырмас оқу құралы.