Астана қаласы әкімдігіне қарасты Жұмыспен қамту орталығы кеше түлектерге арналған бос жұмыс орындар жәрмеңкесін өткізді. Айтулы шараға С.Сейфуллин атындағы Қазақ агротехникалық университетін электроэнергетика, радиотехника, электроника және телекоммуникация мамандығы бойынша оқуын биыл бітірген жастар қатысты.
Шағын-аукционға техника саласындағы 5 кәсіпорын 20 шақты бос жұмыс орнын ұсынды. «Мекемеміз жол қозғалысын реттеумен айналысады. Бағдаршамдық шаруашылық бөліміне инженер-электрик қажет. Тәжірибесі жоқ жас маманды жұмысқа тартып көрмекшіміз. Оларға осы істің қыр-сырын үйрететін кәсіби жетекшіні бекітеміз. Ең басты талап – жоғары білімнің болуы. Еңбекақы – 130 мың теңге» дейді кадр қызметкері Ирина Бойко.
Жәрмеңкенің уақыты дипломды салтанатты түрде табыстау рәсімімен тура келгендіктен, бітірушілердің бар зейіні көптен күткен сәтті тойлауда болды. Өкінішке қарай, жұмыс берушілердің ұсыныс үстеліне қызығушылық танытқандар қатары көп бола қойған жоқ. «Түлектер қазір қуаныш үстінде. Дипломдары қолына тиді. «Бәрі бізді құшақ жая қарсы алады» деп асықпайды. Әдетте жастар еңбек нарығындағы бәсекелістікті күзде ғана ұғады. Сол кезде жан-жақтан жұмыс іздеп, ширақ қимылдай бастайды» дейді Жұмыспен қамту орталығының маманы Ардақ Жексембина.
Оның айтуынша, техника саласындағы жұмыс берушілер осындай шақыртуларды қуана қабылдайды. Жұмыс берушілердің арасында жас маманды өз қаражатына оқытып, жұмыспен қамтуға мүдделі кәсіпорындар да бар екен. Мәселен Астанадағы бірқатар ғимаратты өртке қарсы құрылғылармен жабдықтайтын кәсіпорынның бірі инженер-жобалаушы қызметіне қағілез жастарды іздеп келіпті. «ҚазАТУ-дың білім беру жүйесіне ризамыз. Олардан жақсы инженерлер шығады. Теориялық білімдері терең, біз тек практикаға баулимыз» дейді Инна Магда есімді қадр қызметкері.
Түлектердің бірқатары әңгімелесуден өтіп, жұмыс берушілерге түйіндемелерін қалдырды. Дипломын енді алған түлектер үшін осындай жәрмеңкелер алдағы уақытта да ұйымдастырылатын болады.
Мәдина ЖАҚЫП
