Достық керуені
Қазақстан халқы бірлігі күніне арналған «Достық керуені» мерекелік концерті ұйымдастырылды. Қойылым М.Өтемісов атындағы мектеп оқушылары сарайында өтті. Астана қаласының жалпы білім беретін және жексенбілік мектептерінің тәрбиеленушілері көрермендер назарына түрлі ұлттардың әндері мен билерін ұсынды. Дала казактарының частушкілері, матрешкалар биі, көңілді украин әндері мен қызу қанды кавказ халықтарының билері, тағы да басқа халықтардың өнерлері жиналған қауымның көңілдерінен шығып, алақан қыздыра қол соғылды. Қала тұрғындары мен қонақтары, жасөспірім әртістердің ата-аналары, М.Өтемісов атындағы Мектеп оқушылары сарайының ардагерлері осы дәстүрлі мерекеде достық пен Қазақстан халқының бірлігі мен тұтастығын ән айту мен би билеу түрінде жеткізгені үшін жас өнерпаздарға ризашылықтарын білдірді.
Ырысты ЖАЛҒАСБАЙ