Достықтың ән-би додасы
Ұлттар достастығы бүгiнде Қазақстан халқының ең басты құндылығына айналып отыр. Бейбiтшiлiк пен татулықтың кепiлi болған елiмiзде түрлi диаспоралар мен ұлт өкiлдерi еркiн өмiр сүрiп, ұлттық салт-дәстүрiн ұлықтауға зор мүмкiндiк алуда.
Соның дәлелi «Бiрлiк пен бейбiтшiлiк бесiгi» атты достық фестивалi Қазақстандағы түрлi ұлт өкiлдерiнiң бiрлiгi мен ынтымақтастығын көрсеттi. Астана қаласы Қазақстан халқы ассамблеясының хатшылығы, Астана қаласы мәдениет басқармасы және «Жастар» сарайының ұйымдастыруымен өткен фестиваль халықтар достығын, ел бiрлiгiн, отаншылдықты дәрiптеп, өскелең ұрпақ бойына патриоттық сезiм ұялату мақсатында өттi. Шараға 20 этномәдени орталықтардың шығармашылық ұжымы қатысты. Олардың арасында армяндар, әзiрбайжандар, немiстер, өзбектер, шешендер, түрiктер, татарлар, корейлер, дүнгендер және басқалары бар. Бiрлiк пен татулықты ту еткен түрлi ұлт өкiлдерiнен тұратын «Достық керуенi» шығармашылық тобы өздерiнiң ұлттық билерiмен, әндерiмен тәнтi етiп, көрерменнiң ыстық ықыласына бөлендi. Сондай-ақ, олар мемлекеттiк тiлде өнерлерiн ортаға салып, тiл мен мәдениеттi, әдет-ғұрыпты дәрiптедi. «Ең бастысы, мұндай мерекелер арқылы өзге ұлт өкiлдерiнiң, әсiресе, жастар арасындағы достық қарым-қатынастың орнауына әсер ету, азаматтардың елiне, жерiне, халқына деген құрметiн сезiндiру», – дейдi Астана қаласы Қазақстан халқы ассамблеясы хатшылығының бас маманы Ләззәт Құсайынова. Ал, фестивальға қатысушылардың айтуынша, мұндай шаралар тек басқалардың ұлттық өнерлерiн тамашалап қана қоймай, келе жатқан Қазақстан халқының бiрлiгi күнi мерекесiн бiрiгiп атап өтуге жақсы мүмкiндiк бередi. Өнерiмiз арқылы бiз сол тарихи күнге деген құрметiмiздi бiлдiрiп отырмыз. Өйткенi, бұл мереке – Қазақстанда тұратын барша ұлт пен ұлысқа ортақ мереке. Шара соңында барлық этномәдени орталықтарға ұйымдастырушылар тарапынан алғыс хаттар табысталды.
Еркежан КӨПТIЛЕУҚЫЗЫ