Екі мың жұмысшы жұмылдырылды
Қардың қалың жаууына байланысты Астана қаласының коммуналдық қызмет мекемелері күшейтілген режиммен жұмыс істеп жатыр.
Қала көшелерін тазалауға 800-ден аса арнайы техника бірлігі мен екі мыңға жуық жұмысшы жұмылдырылған. Соның ішінде 569 жұмысшы мен 264 техника Сарыарқа ауданын тазаласа, 588 жұмысшы мен 296 техника Алматы ауданын, ал 276 техника мен 738 жұмысшы Есіл ауданын тап-тұйнақтай етті.
Жұмысшылар алдымен автобус аялдамалары мен жаяу жүргінші жолдары, көпірлер мен өтпежолдар сияқты басқа да адам аяғы үзілмейтін орындарды, аурухана, емхана сынды әлеуметтік маңызы бар нысандардың кіреберістерін тазартудан бастауда. Сонымен қатар көктайғақта көпшіліктің тайып құлап, жарақаттанбауын алдын алуды мақсат тұт-
қан жұмыс тобы тұрғын үйлер аумағындағы тайғанақ жерлерді ретке келтіруді назарға алды. Ол үшін елордада көктайғаққа қарсы қажетті құрал-жабдық қорының жеткілікті екенін айтады мамандар. Ал жиналған қар арнайы полигонға тасымалдануда.
Бұл тұрғыда жергілікті билік елордалықтар мен қала қонақтарын қауіпсіздік шараларын қатаң сақтауға, көлік жүргізушілерін жылдамдықты арттырмай, жол үстінде арақашықтықты сақтай отырып, оқыс әрекет жасамауға шақырды.
«Жаяу жүргіншілер әр қадамын аңдап басып, жолдың екінші жағына тек арнайы белгі көрсетілген жерден ғана өткені дұрыс. Көшедегі техникалар жол көлік қозғалысының баяулауына әкеп соқтыруы мүмкін. Сондықтан бұған түсіністікпен қарап, қала ішіндегі сапарыңызды алдын ала жоспарлап шыққаныңыз жөн» дейді жергілікті билік өкілдері.
Нұрдәулет КӘКІШЕВ