Бұрнағы күні Президент Нұрсұлтан Назарбаев Астананың арнайы экономикалық аймағында орналасқан электровоз құрастыру зауытының ашылу салтанатына қатысып, осында шығарылатын KZ8А сериялы алғашқы электровоздың тұсауын кесті.
Өндірістік аумағы 27 522 шаршы метрді құрайтын жаңа зауыттың іргетасы 2010 жылдың маусым айында қаланған. Оның жылына екі секциялық 50 электровоз шығаруға қауқары бар. Францияның «Альстом Транспорт» компаниясы жасап шығарған қуатты теміржол көлігі Қазақстан мен ТМД және Балтық елдерінің табиғатына бейімделе жасалған екен.
Яғни, электровоз -50 °C пен +50 °C аралығындағы ауа райы өзгерістеріне төтеп бере алады.
Жаңа заманның заманауи электровозының кең кабинасы да кірсе шыққысыз. Онда машинистке қажеттінің бәрі бар: микротолқынды пеш, тоңазытқыш, жұмсақ орындық. Тіпті, еденінің өзі жылытылады екен.
Мемлекет басшысына жаңа жобаны таныстырған «Қазақстан темір жолы» АҚ президенті Асқар Мамин тарту күші 9 мың тоннаға жететін қауқарлы KZ8A сериялы электровоздың қазіргі таңда Ресейде сынақтан өткізіліп жатқандығын, ал 2013 жылғы қаңтардан бастап Қазақстандағы сынағы басталатындығын айтып өтті.
Заманауи үлгіде жасақталған электровоз құрастыру зауытына көңілі толғанын білдірген Мемлекет басшысы салтанатты рәсімде сөз сөйлеп, бұл маңызды жоба экономикалық дамуға үлкен серпін беретінін, технологиялық тұрғыдан өнімділігі жоғары зауытқа ТМД аумағы да ерекше ықылас танытып отырғанын жеткізді.
– Екі жарым жылдың өзінде елімізде 550 жаңа кәсіпорын пайдалануға берілді. Жүздеген мың жұмыс орны ашылды. Бүгін біз Қазақстан үшін маңызды оқиғаның куәсі болып отырмыз. Темір жол көлігі – Қазақстан экономикалық дамуының күретамыры. Экономикалық даму тасымалдаусыз мүмкін емес. Сондықтан да инфрақұрылымға зор маңыз берудеміз. Мемлекет бұл іске үлкен қаржы бөлуде, – деді Елбасы.
Жаңа зауыттың Кеден одағы елдерін электровозбен қамтитындығын айтқан Мемлекет басшысы «бұл Қазақстанның инвесторларға салықтық жеңілдіктер, жер бөлу секілді барлық қолайлы жағдайларды жасап отырғандығын көрсететінін» атап өтті.
Салтанатты шара барысында Достастыққа қатысушы мемлекеттердің темір жол көлігі әкімшіліктері Кеңесінің төрағасы Петр Кучеренко Қазақстан Республикасының Президенті Нұрсұлтан Назарбаевқа «ТМД-ның «Құрметті теміржолшысы» атағын тапсырды.
Электровоз құрастыру кәсіпорнына үш компания 11,2 миллиард теңге инвестиция салыпты. Зауыттың 50 пайыз акциясы ҚТЖ-ға (Қазақстан) тиесілі болса, Трансмашхолдинг (Ресей) және Аlstom (Франция) компанияларының әрқайсысы 25 пайыздық акцияны еншілеген. Сондықтан, зауытты үш компания бірлесіп басқаратын болады.
Жоспарға сәйкес, кәсіпорын өз жұмысын 2013 жылдың қаңтарынан бастап, 2016 жылы жобалық қуатына енетін болады.
Кәсіпорында өнімнің шығуына байланысты жұмысшылар саны бүгінде – 47. Кейін зауыттың өнімділігі артқан кезде олардың қатары 650-ге жететін болады.
Қымбат НҰРҒАЛИ
