Елордадағы эпидемиологиялық жағдай әлі де шиеленісе түсуде және шаһар «қызыл» аймақта. Тәулігіне ауру жұқтырғаны зертханада тексерілу арқылы расталған 366 адамнан тіркелуде, оның ішінде 270-і симптомды, 96 адам симптомсыз ауырған.
Соңғы аптада 4409 дерт жұқтырушы тіркелді. Алдыңғы аптамен салыстырғанда тіркеу саны 3 есе азайды. Дертке шалдыққандарды анықтау мақсатында қалада 24 зертхана жұмыс істейді, онда тәулігіне 11 мыңнан астам ПТР зерттеулер жүргізіледі. Жылдың басынан бері 282114 зерттеу жүргізілді, соның ішінде 83351 тест оң нәтиже көрсетті.
«Омикрон» штамының басты ерекшелігі – вирустың тез таралуында. Ол қалада анықталған сәттен, яғни қаңтар айының басынан 7 ақпанға дейін барлығы 83067 жағдай тіркелді, бұл – пандемия кезіндегі рекордтық айлық көрсеткіш. Алайда пациенттерді стационарларға жатқызу деңгейі қалыпты» дейді елорданың бас санитар дәрігері Сархат Бейсенова.
Қазіргі уақытта қала бойынша 1-компонентпен вакцинацияланғандар саны – 502318 адам, 2-компонентпен екпе алғандар – 469602 адам. Ревакцинация қатарына тиесілі адамдардың 69077-сі немесе 28,2 пайызы ғана екпе алды.
«Дертке қарсы иммундау, ең алдымен, отбасының, балалар мен қарт ата-аналардың денсаулығы үшін маңызды. Егер айтарлықтай кедергілер болмаса, мүмкіндігінше тезірек вакцинация және ревакцинация алу қажет. Айналаңыздағы адамдардың денсаулығы қамқорлық жасау үшін берілген, сондықтан осы мүмкіндікті пайдалану – әркімнің таңдауы» дейді С.Бейсенова.
Вакцинаны бұрынғыдай медициналық ұйымдардың және СОО, СҮ вакцинациялау пункттерінде алуға болады. Вакциналардың бес түрін таңдауға болады: «QazVac», «Спутник V», «Спутник Лайт», «Vero Cell», «Pfizer».
