Астанада тұңғыш рет «ЭКСПО-2017» кубогы жолында жасөспірім спортшылар арасында қар үстіндегі футболдан турнир ұйымдастырылды. Қ.Мұңайтпасов атындағы стадионда өткен жарысқа балалар және жасөспірімдер спорт мектептері атынан 6 команда қатысып, қатты аязға қарамастан барлығы жеңіске жігерлене ұмтылды.
Халықаралық «ЭКСПО» көрмесін насихаттауға арналған жарыстың басты мақсаты да елдің болашағы саналатын жастарға нақты бағыт сілтеу болатын. 14-17 жасар жасөспірімдердің арасынан бірінші орынды, яғни, «ЭКСПО-2017» кубогын №8 балалар және жасөспірімдерге арналған спорт мектебі иеленсе, күміс және қола жүлделер «Астана-1964» командасының екі құрамасына берілді. Сайыс соңында жүлдегерлерге медальдар мен 2017 жылы Астанада өтетін халықаралық көрменің құрметіне жасалған арнайы сыйлықтар салтанатты түрде тапсырылды.
Сонымен қатар, «Астана ЭКСПО-2017» ұлттық компаниясының өкілдері бұл турнирді қаладағы балалар мен жасөспірімдер арасында жыл сайын өткізіп тұруға уәде берді.
