ЕЛ ТАҒДЫРЫ – МЕНІҢ ТАҒДЫРЫМ
Астанада «Елімнің тағдыры – менің тағдырым!» атты XVI Қазақстан халқы достығының фестивалі өтті. Ассамблеяның 20 жылдығы аясында ұйымдастырылған мерекелік байқауға 19 ұлттық мәдени орталықтың өнер ұжымдары қатысты.
Елордада тұрып жатқан барлық ұлт өкілдерінің ана тілінде еркін шығармашылықпен айналысуға жағдай жасауға, туған мәдениетке сүйіспеншілік пен құрмет сезімін тәрбиелеуге, ең бастысы, қазақстандық патриотизмді насихаттауға бағытталған фестивальда үміткерлер жеті жанр бойынша өз өнерлерін ортаға салды. Дәстүр бойынша қалалық мәдени орталықтардың мүшелері ән салып, ұлттық аспаптарда ойнап, би биледі.
Қала тұрғындарына жақсы таныс «Стокротка», «Ладушка», «Станички» топтары жаңа бағдарламасымен таныстырды. Көркемсөз оқудан «Радима» беларусь мәдени орталығының өкілі Максим Колчанав, «Злата» болгар мәдени орталығынан Ольга Андриевская, «Оберег» украин мәдени орталығының мүшесі Александр Бакалярик үздіктер қатарынан көрінді.
Қалалық «Возрождение» немістер қоғамының өкілі фестиваль жеңімпазы Константин Ермоленко әсерімен бөлісіп: «Мен бұл фестивальға төртінші рет қатысып отырмын. Фестиваль өте қызықты. Өнер жарысына елордалық этномәдени орталықтардың барлық өкілдері жиналады. Мен үшін Ассамблея – үлкен бір отбасы, бейбітшілік, татулық пен махаббат орнаған үлкен үй. Әрбір этномәдени орталықтың басқаларға өздерінің салт-дәстүрлерін көрсете алатыны өте қуанышты» деді.
Фестиваль қорытындысында барлық жеңімпаздар мен қатысушыларға дипломдар мен бағалы сыйлықтар тарту етілді.
Айгүл УАЙСОВА