ЕЛ ЖҮРЕГІ – АСТАНА
Тәуелсіздік алған, өзге жұртпен терезесі теңелген еліміз өзінің астанасын, бас қаласын, мәңгілік анасын, мемлекетінің жүрегін ежелгі ел қорғаны болған Сарыарқаның төсіне әкеліп орнатып, Астана деген ардақты атқа ие етті. Бұл ғұмыры мәңгілікке бағыт алған жаңа астана – әлемдегі жаңа қоғамдық құрылысқа құлшына қосылып отырған жаңарған еліміздің әкімшілік орталығы болып, тәуелсіздіктің асыл тілегін, халқымыздың алтын арманын арқалаған ардақты қала – Астана.
Әлем картасына қарасақ, тәуелсіздік жолына түскен талай елдер арманды тілекпен астаналарын өзгертті. Бірақ олардың өркендеп өсуі ондаған жылдарға созылып, ел қуатының өсу жолындағы талай сынақтардан өтіп келеді. Ал, біздің Астанамыз жылды қойып, әрбір ай сайын жаңа ғимараттарға байып, көз алдымызда түрленіп, өсіп-көркеюде. Жаңа қала Астанамыздың осыншалықты тез қарқынмен өсуі және әлемдегі құрылыс жаңалықтарын бойына жинаған әсем ғимараттардың қатар түзеуі тегін емес. Ол – тәуелсіздік алған елдің көшбасшысы, халқы үшін бойындағы ардагерлік қасиетін аянбай жұмсап келе жатқан Тұңғыш Президентіміз Нұрсұлтан Назарбаевтың арқасы.
Астананың ерекше бір қасиеті – ондағы ел басқаратын Ақорда, Үкімет үйі, Парламент үйі, әр саладағы министрліктер ғимараттарымен бірге, елдің көркін түзейтін мәдениет орындары да қарқынды өсіп келеді. Қаланың көшесін аралаған қонақтар Есіл өзенінің жағасына келсе, жұртшылықтың рахаттанып дем алатын осынау бір тұстың орталығынан Кенесары ханның ескерткішін көрер еді. Кенесары өзі шабуыл жасаған патша өкіметінің Ақмола бекінісіне қарап, қабақ түйген қалпында қарап тұрғандай. Соны көріп арыстанша арпалысқан ұлы ханның асыл арманы бүгін орындалғанына тәубе дейміз. Сөйтіп, менің сүйікті Астанам – сәулетті ғимараттармен бірге ұлтымыздың руханият орталығы.
Қазақ халқының бұрын-соңды көрмеген осындай әсем астанасы Еуропадағы ілгері елдердің қайсысының болсын астанасымен таласқа түсе алады.
Менің ойымды, бойымды билеген мақтанышым осы!
Айым ТӨРЕБАЕВА,
Астана қаласы дарынды балаларға арналған №9 «Зерде» мектебінің оқушысы