Біріккен Араб Әмірліктерінде өткен Дүниежүзілік ислам экономикалық форумы аясында Қазақстан Республикасының Президенті Нұрсұлтан Назарбаев Global Islamik Finance Awards ұйымының «Исламдық қаржы бойынша жаһандық көшбасшы» сыйлығымен марапатталды.
Бұл – ислам қаржы нарығын халықаралық деңгейде дамытуға аса зор үлес қосқан мемлекет қайраткерлеріне берілетін мәртебелі сыйлық. Марапаттау рәсімі кезінде Нұрсұлтан Назарбаев «Қазақстан 2009 жылдан бері исламдық қаржыландыру қағидаттарын заңнамалық тұрғыдан енгізу жөнінен ТМД мен Орталық Азияда көшбасшы саналады. Қазіргі уақытта Қазақстанда ислам банкингі, сақтандыру және лизинг саласында өз қызметтерін ұсынатын исламдық қаржы институттарының тұтас бір шоғыры жұмыс істейді» деп атап өтті. Сонымен қатар, Елбасы Қазақстанның халықаралық ислам ұйымдарының қызметіне белсене араласатынын, исламдық қаржыландыруды дамытудағы рөлі күшейе беретінін де жеткізді.
Кеше Астанадағы Орталық коммуникациялар орталығында Мемлекет басшысының мәртебелі сыйлықпен марапатталуына байланысты бір топ мемлекет және қоғам қайраткерлері брифинг өткізді.
Анатолий Башмаков, Мәжіліс депутаты:
– Елбасымыз Нұрсұлтан Назарбаевтың «Исламдық қаржы бойынша жаһандық көшбасшы» сыйлығының лауреаты болғаны – біздің еліміздің сыртқы саясатының көпвекторлығын тағы бір айқындағандай болды. Негізі исламдық қаржыландыру экономикамен ғана шектеліп қалмайды, сонымен қатар білім, мәдениет, жалпы гуманитарлық дамуды қолдап отырған институт. Оның халықаралық мәні де, мәртебесі де өте зор. Ал Нұрсұлтан Назарбаев осы бағыттағы жұмысты жандандыра түскенін тек қана ислам елдері ғана емес, әлемдік қоғамдастық та жақсы біледі. Сондықтан бұл награданың біздің Президентімізге берілуін біздің мемлекетімізге деген халықаралық сенімнің артуымен байланыстырамын.
Төлеутай Сүлейменов, мемлекет және қоғам қайраткері, Қазақстан Республикасының тұңғыш Сыртқы істер министрі:
– Мемлекет басшысы Нұрсұлтан Назарбаевтың осы награданы алғанын үлкен оқиға деп санаймын. Бұл – Елбасымызға ғана емес, елімізге көрсетілген зор құрмет.
Өздеріңіз білесіздер, біздің еліміздің саяси ұстанымы жан-жақты. Төрткүл дүниедегі барлық елдермен ынтымақтастықты әрі іскерлік қарым–қатынасты ұстап келеміз. Соның нәтижесінде Қазақстан бүкіл әлемге сенімді серіктес ретінде танылып отыр. Осының бәрі – Нұрсұлтан Назарбаевтың салиқалы саясатының жемісі.
«Исламдық қаржы бойынша жаһандық көшбасшы» сыйлығы ислам әлеміндегі жоғары наградалардың бірі болып табылады. Бұл тек қана қаржы саласы бойынша берілетін сыйлық емес, жалпы алғанда экономикалық табыстар, гуманитарлық жетістіктер, тағы басқа да салаларды дамыту үшін зор үлес қосқан мемлекет қайраткерлеріне, сонымен қатар сол мемлекетке берілген жоғары баға және сенім деп білемін.
Розақұл Халмұрадов, Қазақстан халқы ассамблеясының мүшесі, Мәжіліс депутаты:
– Елбасымыз Нұрсұлтан Назарбаевтың ислам әлемінің жоғары наградасын алғанын естігенде керемет қуандым. Осындай басшысы бар, осындай мәңгілік елдің азаматы болғаныма қуандым. Елбасымыздың осындай мәртебелі сыйлықпен марапатталуы біздің елімізге деген құрметтің де, сенімнің де артқанын білдіреді. Елбасы мерейі – ел мерейі деген осы. Шынымен де бүгінгі Қазақстан қай жағынан алып қарасаңыз да дамудың даңғыл жолымен келеді. Еуропа мен Азия, батыс пен шығыс елдерімен жақсы қарым–қатынас ұстап отырмыз. Өз елімізде қаншама ұлт өкілдері бірлік пен берекені жақтап өмір сүреміз. Қазақстан халқының ассамблеясы
жасап жатқан жұмыстар басқа елдерге өнеге болып та отыр. Осының бәрін әлем жұрты біледі.
Қазақстанда ислам азық-түлік қауіпсіздігі ұйымы жұмыс істейді. Банктер қызмет жүргізеді. Жалпы, біздің мемлекет ислам әлеміндегі халықаралық ұйымдармен жақсы әріптестік орнатқан. Осының бәрі Президенттің ықыласты қолдауымен жүргізіліп жатыр. Астана төрінде салынып жатқан «Абу-Даби Плаза» кешені сол ынтымақты қарым–қатынастың белгісі десе болады.
Осындай ақжолтай ойлары мен пікірлерін Парламент депутаттары Егор Каппель мен Ахмет Мұрадов та ортаға салды. Мемлекет және қоғам қайраткерлерінің «Елбасы мерейі – ел мерейі» деген жүрекжарды лебіздеріне біз де қосылдық.
Ғалым ҚОЖАБЕКОВ
