ЕЛБАСЫ ҚҰРЫЛЫС АЛАҢДАРЫН АРАЛАДЫ
Кеше Мемлекет басшысы Нұрсұлтан Назарбаев көпфункционалды «Талан Тауэр» және «Әбу-Даби Плаза» кешендерінің және «Жасыл квартал» тұрғын үй кешенінің құрылыс алаңдарында болып, жүргізіліп жатқан жұмыстардың барысымен танысты.
«Талан Тауэр» көп функционалды кешені жобасына 157 орындық қонақүй, ауданы 8300 шаршы метр сауда галереясы және А сыныпты бизнес-орталық пен тұрғын жайлар кіреді. Нысан құрылысын 40-тан аса мердігерлік ұйым атқарып отыр. Мұнда Қазақстанда тұңғыш рет көптеген «жасыл» технологиялар – «жасыл» шатыр, энергияны үнемдейтін жеделсатылар, энергияны сақтаушы әйнектер, жаңбыр суын қайта пайдалану қондырғысы қолданылуда. Сондай-ақ, паркинг және электромобильдерге арналған зарядтаушы стансалар,
арнаулы орындар, велосипедшілерге арналған киім шешетін және жуынатын бөлмелер болады.
Ал «Әбу-Даби Плаза» кешені – түрлі мақсаттағы блоктардан құралған көп функционалды зәулім ғимарат. Атап айтқанда, оған кеңселер, қонақүй және тұрғын үй кешені кіреді. Құрылыстың жалпы ауданы – 500 мың шаршы метр.
«Жасыл квартал» кешені жобасы энергия сақтаудың жаңа технологияларына негізделген. 20 гектардан астам аумақта көп қабатты үйлер, кеңсе ғимараттары, паркинг, сондай-ақ, субтропикалық микроклиматы, экзотикалық дендросаябағы бар шағын көл, биокүмбезді мәдени және әлеуметтік инфрақұрылым нысандарын салу жоспарланған.
Мұнда суғарылмайтын ландшафт жүйесімен қатар «қалдық суды» коммерциялық ғимараттарда қайта пайдалану және қоқысты орталықтандырылған жинау жүйесі, «ақылды» автотұрақ жүйесі, велосипедтерді қоюға арналған орындар мен елдегі электрмен зарядтайтын алғашқы толыққанды станса қарастырылған.
Мемлекет басшысы нысандар құрылысшыларымен әңгімелесіп, атқарылып жатқан жұмыстар жөнінде толыққанды мәлімет алды.
Аманғали ҚАЛЖАНОВ