Елді елең еткізген
Армения премьері қызметінен кетті
Арменияның премьер-министрі Никол Пашинян отставкаға өтініш берді. Armenpress басылымының хабарлауынша, ел президенті үкімет басшысының тілегін қабыл алды.
Премьер-министр осыған дейін отставкаға кету туралы ойын France 24-ке берген сұхбатында да айтқан болатын. Сұхбатта ол биыл 10 желтоқсанда мерзімінен бұрын парламенттік сайлау өткізу үшін 15 қазанда отставкаға кететіні белгілі болған.
Никол Пашинян үкімет басшысы қызметіне 8 мамыр күні кіріскен болатын. Бұл қызметке ол Армения халқы көтеріліске шығып, елде дүрбелең орнағаннан кейін барып келді.
Сахара гүлдене ме?
Ғалымдар Сахараны шұрайландыру жолын ойлап тапты. АҚШ, Қытай және Италия елдерінің ғалымдары зерттеу жұмыстарын жүргізіп, оның қорытындысы Science басылымына жарияланды.
Зерттеушілер Сахараны толығымен, яғни 9 млн шаршы метр аумақты күн және жел электр стансасымен жабу туралы тоқтамға келді. Олардың пікірі бойынша, бұл жер бетіндегі адамзат пайдаланатын энергияның мөлшерін төрт есе көп шығаруға мүмкіндік береді. Мұның нәтижесінде аймақтағы жауын-шашын екі есеге артады.
Бұл іс-шаралар Сахараны көгалдандыруға септігін тигізеді. Осыған дейін климатологтар жаһандық жылынудың салдарынан Сахараның аумағы 10 пайызға артқанын айтып, дабыл қаққан еді.
Журналистің жұмбақ өлімі
Сауд Арабиясының журналисі Джамаль Хашукджидің Түркиядағы өлімі жұмбақ күйде қалып отыр. BBC мәліметіне сүйенер болсақ, журналисті Ыстанбұлдағы Сауд Арабиясының елшілігінде өлтірген.
Журналистке елшілік ғимаратында қол жұмсалғаны Apple Watch смарт сағатына түсіп қалған. Ғимаратқа кірген бойда оған тап беріпті.
Алайда Сауд Арабиясы бұл айыппен келіспей отыр. Олардың айтуынша, Джамаль Хашукджи ғимараттың екінші жағынан шыққан, арнайы бейнебақылау орнатылмағаннан кейін камераға түспей қалыпты.
Джамаль Хашукджи – Сауд Арабиясының билігін жиі сынайтын оппозициялық журналист. Ол 2017 жылы АҚШ-қа қоныс аударған.