ЕЛДІҢ ЕРЕН ЕРЛЕРІ
Елдің мерейін, мемлекеттің мәртебесін, халықтың абыройын, ұлттың намысын көтеруге келгенде спорт сайыпқырандары алдымен еске түсіп жатады. Біле білсек, бұл — заңдылық. Осы орайда, әсіресе, Олимпиада ойындарында жүлдегер атанған спортшыларымызды батырға балап жатамыз. Шынымен де төрткүл дүниенің кіл мықтылары бәсекеге түсетін аламан сайыста топ жару нағыз ерлік емес пе?!
Айта бергіміз келеді, биыл Лондонда өткен ХХХ жазғы Олимпиада ойындарында Қазақстан спортшылары бұрын ел тарихында болмаған жетістікке қол жеткізді. Жеті – алтын (!), бір – күміс, бес – қола медаль! Елдік бәсекеде бүкіл дүние жүзі бойынша 12-ші орыннан көріндік. Бұл – тәуелсіз ел болғалы қол жеткізген толағай табысымыз. Міне, осылайша елдік абыройымыздың асқақтауы сол сайыпқыран спортшыларымыздың арқасы. Сондықтан да Олимп шыңын бағындырған әр спортшымыз ел мақтанышы, халқымыздың батырлары болып қала бермек.
Лондонда дүбірлі дода басталған сәтте-ақ қазақ жанкүйерлері қалпағын аспанға атып қуанышқа бөленеді деп кім ойлаған?! Ойласақ та, ойламасақ та, қазақ елінің нағыз бір патриот спортшысы Александр Винокуров веложарыста шашасына шаң жұқтырмай, Олимпиада чемпионы атағын жеңіп алды. Осыдан 12 жыл бұрын Сидней ойындарында күміс жүлдегер болған атақты спортшымызды сол кезеңде шетелдерге шақырғандар да болған еді. Алайда, ол «Туған елін ешқайда айырбастамаймын» деп Қазақстан туы астында сайыстарға қатыса берді. Сөйтіп, өзінің спорттық ғұмырына Лондон олимпиадасының алтынымен нүкте қойды.
Бүкіл әлем жанкүйерін асқан күшімен, аса салқынқанды мінезімен таңғалдырған ауыр атлетші қызымыз Зүлфия Чиншанло Олимпиада чемпионы ғана болып қоймай, әлем және Олимпиада рекордтарын жаңартып жіберді. Зүлфия Лондон төрінде қазақтың туын желбіреткенде барша қазақстандықтар қуанышқа бөленгені сөзсіз. Сол жеңістен кейін чемпион қызымыз «Мен әлі талай жарыста Қазақстан туын биіктен желбіретемін» деген еді. Сол кезде-ақ оның да нағыз патриот екеніне шүбәсіз сенгенбіз, сене бермекпіз де.
Шаршы алаңның шын шебері Серік Сәпиев Олимпиада чемпионы атағымен бірге ең үздік боксшыға берілетін Баркер кубогын қоса ұтып алуы нағыз ерлік десек жарасады. Екі дүркін әлем чемпионы болған Серіктің бұл жеңісі қазақ спортының тарихи жетістігі болды десек те болады. Ал тағы бір патриот спортшымыз Илья Ильин де Қазақстан спортына өлшеусіз үлес қосты. Илья екі дүркін Олимпиада чемпионы атанған әзірге жалғыз қазақстандық спортшы болып отыр.
Олим алтынын жеңіп алған жеңіл атлет Ольга Рыпакова, ауыр атлеттер Мая Манеза мен Светлана Подобедова да Қазақстан мерейін көтеруге орасан үлес қосқандарын айрықша атап өтеміз. Өйткені, бұл спортшылардың бәрі қазақ елінің атын да, абыройын да төрткүл дүниеге танытты. Бұл – үлкен жеңіс, бұл – ерен ерлік.
Өкінішке қарай, кей жағдайда осындай атақты спортшылармыз туралы көңілге кірбің түсіретін жайттар да болып жатады. Мәселен, өзінің туып-өскен жеріне барып келген Зүлфия Чиншанлоны «Қытайына қайта кетеді» деп жазғырғандар табылса, Винокуровтың осыдан екі жыл бұрынғы бір жеңісін сатып алды деген шетелдік мамандардың пікірін жаңалық ашқандай жариялағандар да аз болмады. Ал, шын мәнінде осы екі спортшы да келешекте тек Қазақстан намысын қорғайтынын талай мәрте айтқаны есімізде. Солай болып та қалмақ. Сондықтан ел мерейін өсірген чемпиондарымыз туралы жалған емес, жағымды пікірімізді сақтап жүрейікші дегім келеді.
Лондон олимпиадасында Қазақстан туын биіктен желбіреткен сайыпқыран спортшыларымыздың жеңісті дәстүрі 2016 жылы Бразилияда өтетін Олимпиада ойындарында жалғасын табады деген сенімдеміз. Жеңімпаздар дәстүрі жеңістерге бастай берсін!
Ғалым ҚОЖАБЕКОВ