«Нұр Отан» ХДП Астана қалалық филиалының кезектен тыс 16 конференциясы өттi. Жиында ұйымның iшкi жұмыстары сараланып, сонымен қатар елордалық партия белсендiлерi Елбасы Жолдауында айқындалған мiндеттердiң орындалу барысын талқыға салды. «Қазақстан» орталық концерт залында өткен конференцияны «Нұр Отан» ХДП Астана қалалық филиалының төрағасы Иманғали Тасмағамбетов жүргiздi.
Алдымен елордалық белсендiлер партияның Саяси кеңесiнiң құрамын және Бақылау-тексеру комиссиясының құрамын қайта қарап, бiрқатар өзгерiстер енгiздi. Одан соң елордалық филиал төрағасының бiрiншi орынбасары Қайрат Жаңабергенов ұйымның тындырған iсiн баяндап бердi. Жалпы, өткен жылы партияның қоғамдық қабылдауына 8 мыңнан астам адам келген. Оның 7 мыңына заңдық кеңес берiлiп, 1 мың өтiнiш иесiне жазбаша жауап жолданыпты.
Бұдан соң конференция делегаттары сөз алып, мiнберден Елбасы Жолдауы жүктеген мiндеттердiң орындалу барысы туралы ойларын ортаға салды. Мәжiлiс депутаты Гүлжан Қарағұсова өткен жылы Астанада «Жұмыспен қамту» бағдарламасы бойынша бөлiнген қаржы толық игерiлмегенiн айтты. Халықпен жиi дидарласатынын алға тартқан депутат тұрғын үй мәселесiне де тоқталды. Бұған Астана әкiмi Иманғали Тасмағамбетов былай дедi: «Қазiргi таңда тұрғындарға қолжетiмдi баспана мен азаматтарды жұмыспен қамту мәселесiнiң өзектi екендiгiмен келiсемiн. Әрине, бiз республика тұрғындарына тек Астанадан ғана жұмыс тауып берiп немесе оларды тұрғын үймен тек елордада ғана қамтамасыз етiп, қалыптасқан мәселенi түбегейлi шеше алмаймыз. Еңбек ресурстарының басым бөлiгi бiзге елордада емес, аймақтарда аса қажет. Сондықтан бiзге өзiмiз атап өткен мәселелердiң аймақтарда шешiлуiне ықпал ететiн мықты мемлекеттiк бағдарлама қажет. Қазақстанда бүгiнде әр азаматтың әлеуметтiк мәселелерiнiң өзi туып-өскен жерiнде шешiлетiндей жағдай жасау қажет». Бұдан соң Елбасы Жолдауында баса айтылған баспана мәселесiне де тоқталды. «Бiз нарықтық экономикада өмiр сүрiп жатырмыз. Кеңес үкiметiнiң өзi халықтың барлығына тегiн үй бере алмаған. Бұл – қол жетпейтiн аңыз. Әр адам өз үйiне өзi ақша табуы тиiс. Бұл iске өз бiлiмдерi мен мүмкiндiктерiн жұмсап, еңбек ету керек. Мемлекет баспананың бағасы қолжетiмдi болуына барынша жағдай жасайды» деген ол партияның барлық мүшелерiнiң алдында үлкен мiндет тұрғанын айтты. Ол – «нұротандықтардың» халыққа берген уәдесi мен сертiне адалдық танытуы қажеттiгi.
– Қалалық партия мүшелерiнiң ең басты мiндетi – осы елде жүргiзiлiп жатқан саясатты елге түсiндiру. Бұл «тыңдалмаса, тыңдалмасын, айтылмаған сөз қалмасын» деп қызыл сөзге жүгiну емес, елдiң мұң-мұқтажына ортақтасу, оны атқарушы органға жеткiзу, сол бойынша нақты iс-әрекет атқару, – деп түйiндедi өз сөзiн И.Тасмағамбетов.
Конференцияға қатысушылардың бiр тобына жемiстi еңбектерi үшiн Құрмет грамоталары табыс етiлдi.
Айнұр ШОШАЕВА
