Орталық коммуникациялар қызметінде «Самұрық-Энерго» АҚ басқарма төрағасы Алмасадам Сәтқалиевтің электр энергетикасы саласындағы жобаларды іске асыру мәселелері бойынша брифингі өтті. Төрағаның айтуынша, «Самұрық-Энергоның» инвестициялық портфелінде электр қуаты тапшылығы мəселесін шешуге мүмкіндік беретін 14 жоба бар екен.
«Елбасы Жолдауында көрсетілген барлық басым бағыттар «Самұрық-Энерго» компаниясының 2022 жылға дейінгі даму стратегиясында қамтылған. Біздің қазіргі мақсат-міндетіміз – Қазақстанның энергетикалық қауіпсіздігін қамтамасыз ету, əлеуметтік жауапкершілікті арттыру, жаңғырмалы энергия көздерін жаңғырту, жоғарғы технология, сəйкесінше жаңа қуат көздерін салу, қоршаған ортаға келетін зиянды азайту» деген Алмасадам Майданұлы оларды іске асыру электр қуаты тапшылығы мəселесін шешуге мүмкіндік беретіні жəне өңірлердің əлеуметтік-экономикалық дамуы үшін жаңа мүмкіндіктер ұсынатынын жеткізді. Қазір ҮИИД бағдарламасы аясында Екібастұз 1-МАЭС-ті жаңғырту жəне қуатын кеңейту, Екібастұз 2-МАЭС-тің 3-энергия блогын сала отырып кеңейту жəне қайта құру, Шардара ГЭС-ін жаңғырту, Алматы қаласы мен Алматы облысында қосалқы станциялар салу жəне қуаты 45 МВт Ерейментау ЖЭС-ін салу сынды 6 жоба іске асырылып жатқан көрінеді.
Ал қазірдің өзінде «Самұрық-Энерго» жобалау қуаты 1 320 МВт-тық Балқаш ЖЭС-ін салу жобасы бойынша жұмыстарды жүргізіп жатыр.
«Станцияны салу елдің ұзақ мерзімді энергетикалық қауіпсіздігін арттыруға мүмкіндік береді. Қазіргі кезде құрылыс алаңын жоспарлау жұмыстары жасалып жатыр, автокөлік жолдарын салу басталды, жарылыс жұмыстары жүргізілді. Инфрақұрылымды дайындау – кіреберіс темір жолдарды қайта жөндеу, химиялық су тазарту цехын салу, сумен қамтамасыз ету және кәріз жүйелерін салу жұмыстары аяқталды. Балқаш көлінен сутартқыш пайдалануға берілді» деді Алмасадам Сәтқалиев.
Балқаш ЖЭС-інде қолданылатын ноу-хау энергия блоктарының тиімділігін арттырады және отынның үлес салмағын азайтады. Сонымен қатар, жобада қоршаған ортаға тиетін зиянды мейлінше болдырмауға айрықша көңіл бөлінген.
Нұрислам ҚҰСПАНҒАЛИ
