Заман күннен-күнге қарыштап дамып келеді. Кешегі желмая мініп, жел қанат жүйрік баптаған қазақтың да тұрмыс-тіршілігі мен өмір сүру салты өзгерді. Көшпенділіктен толықтай қала өміріне ойысып, өркениетті елдермен қатар заман көшіне ілескен қазақтың қалалары да күн сайын жаңғырып, жаңаланып келеді.
Әрине, қала болғандықтан тұрғындардың өмірін жеңілдететін, қажетті қызметтер мен ресурстарды ұсынатын инфрақұрылым болуы тиіс екенін бәріміз білеміз. Қарапайым мысал ретінде жолдар, көпірлер, қоғамдық көлік жүйесі, су және электр жүйелері, байланыс желілері, ауруханалар, мектептер, мәдениет және спорт нысандарының болуы – қала өмірінің айнымас бір бөлігі. Оның үстіне қазіргі таңда көлік жүйелері тек адамдарды тасымалдап қана қоймай, экология мен қала тұрғындарының өмір сапасына ықпал етеді. Әсіресе электробустар сияқты инновациялық көлік түрлері жаңа деңгейге көтерілді. Электр қуатымен жұмыс істейтін бұл көліктер тек экология жағынан тиімді емес, экономикалық және әлеуметтік тұрғыдан да үлкен пайда әкелуде. Айталық, электробустардың бірнеше артықшылығы бар. Олар жанармай емес, электр қуатын қолданатындықтан ауаны ластамайды. Бұл қоршаған ортаға пайдалы, әсіресе Астана сияқты үлкен қалаларда ауа сапасын жақсартуға үлкен үлес қосады. Сонымен қатар, ол дәстүрлі автобуспен салыстырғанда әлдеқайда тыныш жұмыс істейді. Олар дыбыс шығару мен тербелістерді азайтады, бұл қала көшелеріндегі шуды төмендетеді және тұрғындарға қолайлы жағдай жасайды. Электр қуатының құны жанармайға қарағанда төмен болғандықтан, ұзақ мерзімде қаржылық тиімділікке әкеледі.
Қазіргі уақытта Астана қаласында 120 электробус жұмыс істеп тұр. Оның ішінде: 2019 жылы Қостанай қаласындағы «Сарыарқа автопром» ірі торапты жинақтау зауытында өндірілген 12 метрлік YtongZK6128BEVG моделінің 100 электробусы, 2023 жылы Сарань қаласындағы «Qaz Tehna» ірі торапты жинақтау зауытында өндірілген 18 метрлік YtongZK6180BEVG модельді 20 электробус. Бұл электробустар Қытайда Ytong зауытында шығарылған. Біз олардың жай-күйімен танысу үшін Тайбурыл көшесі, 46 мекенжайындағы өндіріс базасында орналасқан №1 автобус паркіне барып, зарядтау станцияларын көріп қайттық.
– Жалпы электробустарды пайдалануға көшу – бұл болашаққа жасалған маңызды қадам. Олар экология тұрғысынан таза, тиімді және ұзақ мерзімді пайдалану үшін арналған. Біз әрдайым техникалық қызмет көрсету мен жұмыс процесін оңтайландыруды мақсат етіп, парктің барлық көлігін үздіксіз бақылауда ұстаймыз. Әрбір электробус, оның батареясынан бастап қозғалтқышына дейін, жоғары сапалы компоненттермен жабдықталған, бұл олардың тиімділігін арттырып, ұзақ мерзім жұмыс істеуіне мүмкіндік береді. Сондай-ақ, мұндағы электробустарда литий-ионды аккумуляторлар орнатылған, олар 4-5 сағатта толық зарядталып, 350 шақырымға дейін жүре алады. Ал бір автобустың қалада басатын жолының қашықтығы 250-280 шақырымды құрайды. Сондай-ақ, электробустар түнде зарядталады, бір электробустың зарядталу уақыты 4-5 сағатты құрайды. Қазіргі таңда станцияда жалпы саны 50 зарядтау құрылғысы бар, әрбір станция екі электробусты зарядтауға арналған. Электробустардың техникалық қызметі 20 мың шақырым сайын зауыт өндірушісінің белгілеген регламенті бойынша жүзеге асырылады, – дейді инженер Мирас Аманжолов.
Бұл электроавтобустардың тағы бір тиімділігі қыстыгүні бензин моторлы автобусқа қарағанда оталуы да тез. Өйткені электроавтобустардың жүруіне күннің ыстық-суықтығының мүлдем кері әсері болмайды. Бұдан бөлек, жазғы маусымда ауа райы жағдайына байланысты маршрутта жүріп бара жатқанда кондиционерлер қосылады. Қыстыгүні ол жылу көзі ретінде қолданылады. Бұл аккумулятордың қуатына әсері болғанмен, оның таусылуына әкеп соқпайды.
Шапағат ӘБДІР
