Алқа-салқа көлікпен адам тасиды
Өкінішке қарай, қалалық медициналық жедел жәрдем стансасы сапалы қызмет көрсетуге мән беруден қалды. 22 мамырда, түнгі сағат 1:20 шамасында болған жедел жәрдем машинасының (мемлекеттік нөмірі – Z118CC, борт нөмірі – 41) жол- көлік апатынан дәрігер мен медбике, сондай-ақ, 1981 жылғы ұлым А.С. Ғаббасова қатты зардап шекті. Көлік қатты соқтығылысқанда, басын кабина мен салонның ортасындағы металл далдаға қатты ұрғаны сондай, әлгі жер майысып қалды, өзі майып бола жаздады. Келесі күні көліктің ішін көріп, жағамды ұстадым. Едені мен орындықтары жырым-жырым, ілініп тұратын құрылғылар жерде жайрап жатыр, көліктің темірі әбден тоттанған, жанындағы есігінің ішкі жағы жұмсақ материалмен қапталмаған. Сонда осындай алқа-салқа көлікпен қалай адам тасисыздар?
Сырым Ғаббасов
Өтініш 28 мамырда түсіп, 11 күнде жауап берілді.
Құзіретті мекеме не дейді?
Денсаулық сақтау басқармасы:
Қазір қалалық медициналық жедел жәрдем стансасының балансында 76 санитар автокөлігі бар. Олардың жартысына жуығы, дәлірек айтсақ, 48 пайызы тозған. Он шақтысы жөндеуге де келмейді. Астана қаласының тұрғындарына толыққанды қызмет көрсету үшін күн сайын 77 бригада үздіксіз жұмыс істеуі керек. Көлік жетпегесін, 62-64 бригаданы ғана жасақтау мүмкін боп отыр. Сол себепті, ара-тұра ескі көлікті де пайдалануға тура келеді. Жыл аяғына қарай 13 автокөлікті республикалық бюджет есебінен, алтауын қалалық бюджет есебінен сатып алып, автопаркімізді жаңартсақ, әлгі айтқан санитар көлігін жарамсыз деп тауып, қолданыстан шығару ойымызда бар.
«Жол-пол» жоқ белгі үшін жөнсіз соқтықты
24 сәуірде, ұмытпасам кешкі сағат 8-9 шамасында Қабанбай батыр даңғылы бойынан жол полициясы тоқтатып, құжаттарымды көрсетуімді сұрады. «Қандай негізде тоқтаттыңыздар?» деп қарсы сұрақ қойдым. Өйткені, таяқшасы жанбады, ысқырығы қалтасында, онымен қоймай, дәл «ҚазМұнайГаздың» түбіндегі көпірге өтер жерден тоқтатып тұр. «Жол көлік ережесін бұздыңыз, «Тыйым салынған» деген белгіні елеместен бірінші жолақтан тіке жүрдіңіз» деді. «Таңертең жоқ еді, кешке дейін қойып үлгердіңдер ме?» деп таңырқай қойған сұрағыма «жол-пол» қызметкері дөрекі тіл қата бастады. Болмаған соң, ерінбей барып, әлгі жерде ешқандай да белгі жоқтығына көз жеткізіп келдім де, бұлтартпас дәлел болу үшін мына видеоны түсіріп алдым: )http://www.youtube.com/watch?v=-SFJs15CH1Y ). Жетон нөмірі – Z 348, көлігінің мемлекеттік нөмірі – M 192 DON. Инспектордың аты-жөні – Жарқынбаев Асқар Алиайдарұлы.
Медет Тот
Өтініш 25 мамырда түсіп, 10 күнде қаралды
Құзіретті мекеме не дейді?
ІІБ ЖПБ:
Сіздің шағымыңызды Астана қаласы ІІБ-ның Жол полициясы басқармасы қарастырып, аталған факті бойынша қызметтік тексеріс бастады. Жағдайды әділ, жан-жақты қарастыру үшін Жетіген көшесі, 16 үйде орналасқан жол күзеті бөлімшесіне, №16 кабинетке келіңіз.
Дүңгіршек иесі қулыққа басты, ал, СЭС жауапкершіліктен қашты
«Орбита» сауда үйіне таяу, Петров көшесіндегі №1 үйдің іргесіндегі санитарлық нормаларды өркескел бұзып отырған «Куры гриль» жылжымалы дүңгіршегіне қатысты шара қолдануларыңызды өтінемін. Дүңгіршек орналасқан жер Астана қаласы әкімдігінің қаулысымен бекітілген сауда орындарының тізімінде жоқ. 28 мамырда Алматы ауданы әкімдігінің қызметкерлері алып тастағысы келіп еді, иесі «бір күннің ішінде өз еркіммен аламын» дегесін, жайына қалдырды. Алайда, қулыққа басты, күндіз жауып тастайды да, саудасын кешқұрым қыздыратынды шығарды. Әлгі дүңгіршектен сатып алған тамағын адамдар тура біздің үйдің кіреберісінде отырып жейді. Қағаз майлық, темекінің тұқылы шашылып жатады, тіпті, кейбір ұяттан безгендері үлкен дәреттерін осында өтейтінін қайтерсің. Түсірген шағымымыздан түк шықпады. Қалалық СЭС санитарлық нормалар көрінеу бұзылып, инфекциялық ауру тарату қаупі төніп тұрса да, кәсіпкерлік туралы заңның талабына сүйеніп, тексере алмайтындығын мәлімдеді. Полицияның тірек-бөлімшесіндегілер «сауда жасауға рұқсаты бар» деп шара қолданудан бас тартты, ал, Кәсіпкерлік және өнеркәсіп басқармасының атынан жауап берген Ж. Бескемпірова биыл ешқандай рұқсат берілмегендігін жазып, ІІБ-ге сілтейді. Сонда мұнымен кім айналысады?
Ысқақ Құлатай
Өтініш 31 мамырда түсіп, 8 күнде орындалды.
Құзіретті мекеме не дейді?
«Алматы» ауданының әкімдігі:
Алматы ауданы әкімдігінің мамандары Петров көшесі, №1 үйдегі «Донер» және «Куры гриль» дүңгіршектерін алып тастатқызды.
Бабатайұлын жөндейтіндер барсыңдар ма?
«Көктал-1» шағын ауданындағы Дулат Бабатайұлы көшесінің көп-көрім асфальтталған жолы бар еді, жөндейміз деп бастады да тастады. Біздің ауданды қадағалайтын инспектор Әділхан Жолдасбаев тұрғындардың арыз-шағымына селт етпейді, «ертең-ертеңмен» тойғызып келеді. Көктемгі, күзгі жауын-шашында таяқ тастам жердегі дүкенге барып-келудің өзі мұң. Көлікті жудың-жумадың – бәрібір лас болады. Жол жөндеу жұмыстары кезінде жанындағы қара жолға тым болмаса қиыршық тас, құм төксе де болар еді.
Ольга Суслова
Өтініш 6 мамырда түсіп, 4 күнде жауап берілді.
Құзіретті мекеме не дейді?
Жолаушылар көлігі және автомобиль жолдары басқармасы:
Қаржыландыруға қарай осы жылдың екінші жартысында Бабатайұлы көшесін асфальттау жалғастырылады.
Лагерь деп әбігер боп жатырмыз
Өзім ата-ана әрі мұғаліммін. Сізге қояр сұрағым – мектеп жанындағы лагерьге мемлекет тарапынан қаржы бөліне ме? Оған қандай балалар бара алады? Лагерь деп әбігер боп жатырмыз. Мектеп әкімшілігі «әр сыныптан 15 баладан шығарасыңдар, әйтпесе, демалысқа шықпайсыңдар» деп мұғалімдерге қатаң талап қойыпты. Бала басынан 2500 теңгеден жиналған қаржыны бастауыш білім беру жөніндегі меңгеруші қалтасына жымқырады деген қауесет тағы бар. Мектеп тарапынан бұрындары лагерьге қағаз, қалам, ойыншықтар бөлінуші еді, кейінгі 5-6 жыл ештеңе көрмейміз.
Нағима
Өтініш 6 мамырда түсіп, 4 күнде жауап берілді.
Құзіретті мекеме не дейді?
Білім беру басқармасы:
Жазғы демалыс кезінде балалар мен жасөспірімдердің демалысы, сауықтырылуы және еңбекпен қамтылуы – ең маңызды әлеуметтік мәселелердің бірі. Елордамызда 3 маусымда 1-4 сынып оқушыларының бос уақытын қызықты өткізетін 66 мектеп жанындағы лагерь өз жұмысын бастады. Ол лагерьлерге мемлекет тарапынан қаражат бөлінбейді, тек қана жетім, ата-анасының қамқорлығынсыз қалған, аз қамтылған отбасынан шыққан балалардың тамақтануына жергілікті бюджеттен қаржы қарастырылады. Ал, қалған бастауыш сынып оқушылары ақылы түрде өз еркімен, ата-анасының рұқсатымен демалып, сауыға алады. Биыл мектеп жанындағы лагерьлерде тамақтану құны күніне 240-260 теңгені құрайды.
Дайындаған: Әділбек ЖАПАҚ
