Елена ХАМХОЕВА, «Ақбота» сауда ойын-сауық орталығының директоры: ҚАЗАҚЫ НАҚЫШҚА МӘН БЕРДІК
– Елена Геннадьевна, бүгін Астанада алғаш рет балаларға арналған зәулім орталықтың тұсаукесер рәсімі өтеді. Орталықтың ерекшелігі неде?
– Астанада бірнеше сауда ойын-сауық орталықтары бар. Тәуелсіздік көшесінде жаңадан бой көтерген орталықтың ерекшелігі – үш қабаты да балалар әлеміне арналған. «Ақбота» – қазақ халқының дәстүрі мен әдет-ғұрпындағы көрнекті энциклопедия болуды көздейді. Өйткені, мұнда ұсынылған өнімдердің түрі мен сипатына аса мән берілді. Қазақы нақышты қолдануды жөн көрдік. Өйткені, заман ағымына сай бейімделген қазақтың ұлттық нақыштағы кез келген бұйымы қашан да үлкен сұранысқа ие.
– Мынау «Ақботаныкі» деп ауыз толтырып айтатын қандай жаңашылдық бар?
– Айта кету керек, орталықтың ашылуына ең алдымен тәжірибелі дизайнерлер көп еңбек етті. Ойыншықтар үлгісі, балалар жамылғысы, тағы басқа тауарларда қолданбалы өнердің иісі аңқып тұр. Ойыншықтардың өзі арнайы тапсырыстар бойынша шетелде жасалды. Жаңашылдық дегенге келсем, дүкеннен Әсел, Әділ, Назерке есімді сапалы қуыршақтарды көруге болады. Мұның өзі балғындардың сүйікті ойыншығына айналады деп ойлаймын.
– Басқа қандай тың жаңалықтар бар?
– Бірінші қабатында тек таза өнімдерден дайындалатын балалар дәмханасы қызмет көрсетеді. Swarovski кристалдарымен көмкерілген ұлттық үлгідегі бөлме бар. Онда «бесікке салу», «тұсаукесер» салт-дәстүрлерін насихаттайтын көріністер қойылған.
Орталықта айына бір рет көрсетілімдер болып тұрады. Ол үшін арнайы қондырғылар орнатылып та қойды. Ал, алдағы уақытта бала тәрбиесіне қатысты жапон технологиясы негізінде орталық ашып, жұмыс жүргізу жоспары да бар.
– Ашылу салтанатына кімдер шақырылды?
– Іс-шараға елордалық депутаттар, саясаткерлер, қоғам қайраткерлері, медицина қызметкерлері келуге ықылас білдіріп отыр. Ал, ең үлкен қонағымыз, ол, әрине – балалар. Ашылу салтанатында қазақтың шілдехана тойы мен шашу көрсетіліп, келген жұртқа мерекелік көңіл-күй сыйлаймыз.
– Әңгімеңізге рахмет!
