Астана қаласының құрамасы IX республикалық “WorldSkills Kazakhstan-2024” чемпионатында көш бастады. Үш күндік сайыста командалық есеп бойынша елордалық студенттер бірінші орынға табан тіреді.
Республикалық дода 14-18 қараша аралығында өтіп, оған 550-ден астам өңірлік кезеңнің жеңімпаздары қатысты. Әр өңірдің үздік студенттері 30 құзыреттілік бойынша бақ сынап, біліктілігі мен тәжірибелерін ортаға салды. Олардың арасында электромонтаж, энергетика, кірпіш қалау, шанақты жөндеу, аспаздық және ресторан ісі, IT шешімдері, WEB-технологиялар, мобильді робототехника, мехатроника, прототиптеу және басқа да құзыреттіліктер болды.
Республикалық байқаудың қорытынды кешіне Оқу-ағарту министрі Ғани Бейсембаев қатысып, дарынды студенттерді жарқын белесімен құттықтап, ел мерейін арттыра беруді тіледі.
Тартысты чемпионаттың қорытындысы бойынша командалық есепте Астана қаласының студенттері 5 алтын, 1 күміс, 5 қола медаль иеленіп, сондай-ақ кәсіпқойлық үшін 6 медальон алып, республика бойынша үздік атанды. Жеңімпаздар келесі жылы Данияда өтетін EuroSkills чемпионатына қатысу үшін ұлттық құрамаға кіру мүмкіндігіне ие болды.
Индира Бержанова
