Елорда тынысы

Елорда тазалығы – өз қолымызда

Елордада жалпықалалық және коммуналдық сенбіліктер, сондай-ақ ағаш отырғызу іс-шаралары жоспарланып отыр. Осыған орай, «Birge – taza Qazaqstan» республикалық акциясы аясында 16 сәуір мен 16 мамыр аралығында экологиялық айлық өтеді.

[smartslider3 slider=2697]

 

Экологиялық айлық аясында қалада мынадай шаралар жүргізіледі: нөсер және арық-науалық кәріз желілерін санитарлық тазарту, көшелерді, тротуарлар мен өзге де аумақтарды қоқыстан тазарту, саябақтар мен гүлзарларда егілген көшеттерді күту жөніндегі маусымдық агротехникалық жұмыстар, көгалдар мен гүлзарлар орнату, рұқсат етілмеген тұстарға тасталған қоқыстарды, ластанған учаскелерді тазарту.

Сонымен қатар, 16 сәуірде елордада жалпықалалық сенбілік өтеді. Бұл ретте қаланың барлық кәсіпорындарын, МИБ (ПИК), шағын және орта бизнес субъектілерін, волонтерлер мен белсенді қала тұрғындарын сенбілікке қатысуға шақырамыз. Сенбілікке қатысушылар арнайы құралдармен (күрек, тырма), қолғаптармен және қаптармен қамтамасыз етіледі.

Сондай-ақ елорда тұрғындары мен қонақтары жалпықалалық сенбіліктерге өз бастамасымен қатысып, кварталішілік (үй маңындағы) аумақтарды тазалай алады.

Одан кейінгі сенбі, яғни 23 сәуірде бас шаһарда жалпықалалық сенбілік және жаппай ағаш отырғызу іс-шарасы өтеді. Бұл ретте қала аумағын қыс мезгілінен кейін тазарту, рекреа­циялық аймақтарды, саябақтарды, гүлзарларды, аулаларды, сондай-ақ сауда нысандарына, қоғамдық тамақтану орындарына және басқа да ұйымдарға іргелес аумақтарды жинау жоспарланып отыр.

Алматы ауданының тұрғындары мына мекенжайларда ағаш отырғыза алады: Қошқарбаев даңғылы, Тәуелсіздік көшесінен Сарыкөл көшесіне дейін,  Момышұлы даңғылы, Футбол федерациясы аумағы, Б.Момышұлы гүлзары, Қ.Қуанышбаев атындағы Мемлекеттік академиялық қазақ музыкалық драма театры, Есіл өзені бойындағы саябақ, 1-кезек, Жүргенов көшесі, Әзірбаев көшесінен Бөлекпаев көшесіне дейін.

Байқоңыр ауданында ағаш отыр­ғызу іс-шарасы мына тұстарда өтеді: Жұбанов, 9; Асан Қайғы, 8; Тәшенов, 17/1; Республика, 26; Иманов, 44; Бараев, 21; Жұбанов, 4; Кенесары, 70А; Кенесары, 42, 44, 46; Уәлиханов, 9/1, 9/2, 9/3; Бөгенбай, 56; Кенесары, 50.

Есіл ауданында ағаш отырғызу іс-шарасы Ботаникалық бақта, желілік саябақта және Қ.Мұхамедханов көшесінде (Ш.Айтматов көшесінен Тұран даңғылына дейін) өтеді. Сол сияқты кәсіпорындардың, ұйымдардың және т.б. еңбек ұжымдарымен іргелес көгалды тұстар аумағына ағаш отырғызу және маңайын қоқыстан тазарту жоспарланып отыр.

Сарыарқа ауданында көшелер ғана емес, қаладан сыртқарырақ орналасқан елді мекендер де көгалдандырылады. Мысалы, Көктал-2 елді мекенінің Ақмола және Ұлытау көшелері бойында отырғызылады. Сондай-ақ аудан тұрғындарымен, кәсіпорындар мен ұйымдардың, мемлекеттік мекемелердің еңбек ұжымдарымен және т.б. іргелес көгалды тұстарда жаппай ағаш отырғызу және аумақты тазарту жоспарланып отыр.

Жалпықалалық сенбіліктердің негізгі мақсаты қоғамның назарын қала көшелерінде тазалықты сақтау және экологиялық мәдениетті қалыптастыру мәселелеріне аудару болып саналады. Осылайша, қала тұрғындары мен ұйымдары көшелер мен аулаларды абаттандыруды жақсартуға өз үлесін қоса алады.

«Birge – taza Qazaqstan» республикалық акциясы аясында елордада апта сайынғы сенбіліктерге 80 мыңнан астам адам, 10 мың кәсіпорын мен ұйым қатысады деп күтіліп отыр. Экологиялық акция аясында жалпы ауданы 5,5 млн шаршы метрден астам саябақтар мен гүлзарлар тазартылып, 12 мыңнан астам көшет отырғызылатын болады.

 

Тағыда

Ұқсас жаңалықтар

Пікір үстеу

Back to top button