Астанаға турист ретінде келушілердің саны жылдан-жылға артып отыр. Елордаға жолы түсетін шетелдік туристердің негізгі ағымы Ресей, Қытай, Германия, Түркия, АҚШ және Оңтүстік Корея елдерінен келетіні байқалады. Биыл Астанада туристік маңызы бар 1200 іс-шара өтетіні жоспарланып отыр. Оның ішінде 100-ден аса халықаралық форум болмақ.
Елордада туризмді дамытудың негізгі бағыттары белгіленген. Бұл – оқиғалық, іскерлік және медициналық туризм. Астана қаласының Коммуникациялар қызметі алаңында осы туралы баяндаған қалалық Инвестициялар және кәсіпкерлікті дамыту басқармасы басшысының орынбасары Мақсат Жаңабаев саланы ілгерілетуге бағытталған жұмыстармен таныстырды.
Қажетті инфрақұрылым құрылды
Оның айтуынша, бас қалада туризм көрсеткіштері үш жыл қатарынан тұрақты өсуде. Алдын ала деректер бойынша 2024 жылы туристер саны 2023 жылмен салыстырғанда 14%-ға артып, 1,5 млн туристті құрады (резидент еместер 400 мың адам, резиденттер 1,1 млн адам). Бұл көрсеткішті 2030 жылға қарай 3 млн туристке дейін ұлғайту жоспарланған.
– Елордаға шетелдік туристердің негізгі ағымы Ресей, Қытай, Германия, Түркия, АҚШ, Ұлыбритания, Үндістан және Оңтүстік Корея сияқты елдерден байқалады. Бүгінгі таңда Астанада туристерге жайлы болуы үшін барлық қажетті инфрақұрылым құрылды. 100-ден астам туристік нысан бар. Бұл – мұражайлар, театрлар, сарайлар, діни нысандар, спорт кешендері, сауда-ойын-сауық орталықтары, саябақтар және тағы басқа нысандар. Қалада 9,9 мың нөмірлік 286 қонақүй жұмыс істейді. Бұл – 17,5 мың төсек-орын. Соның ішінде 5 жұлдызды 8 қонақүй, 4 жұлдызды 38 қонақүй, 3 жұлдызды 64 қонақүй, санатсыз 176 қонақүй бар. 2024 жылдың 9 айында қонақүйлер көрсеткен қызметтер көлемі 36%-ға артып, 46,1 млрд теңгені құрады. 2023 жылдың 9 айында 33,9 млрд теңге болған еді, – дейді Мақсат Жаңабаев.
Инвестициялар көлемі артты
Баяндамашының айтуынша, өткен жылдың 11 айының қорытындысы бойынша туризм саласындағы негізгі капиталға инвестициялар көлемі 253 млрд теңгені құрап, 3 есеге артты. MasterCard мәліметтері бойынша туристердің күніне орташа шығыны 230 долларды құрайды. Елордаға келетін туристердің шығындары, негізінен, мына қызметтерге келеді: қонақүй – 64,4%, бөлшек сауда – 11,1%, мейрамханалар – 9,2%, азық-түлік дүкендері – 4,9%, көлік – 1,6%, денсаулық пен сұлулық – 1,2%, барлар мен түнгі клубтар – 1,1%, ойын-сауық – 0,3%, үй тауарлары – 0,3%.
Астана маңызды оқиғалардың алаңына айналды
Мақсат Жаңабаевтың мәліметінше, өткен жылы Астанада 785 іс-шара өткізілген. Оның 70-тен астамы халықаралық іс-шаралар болды. Былтырғы ең маңызды оқиғалардың қатарында 16 мемлекеттің көшбасшыларын біріктірген Шанхай ынтымақтастық ұйымының саммиті мен 89 елден 250 000-нан астам адам қатысқан V Дүниежүзілік көшпенділер ойындары бар. Өткен жылы Comic Con фестивалін 100 000-нан аса адам көрді.
Ал 2025 жылы 1200 іс-шара өткізу жоспарланған. Оның 100-ден астамы халықаралық болмақ. Биыл конференциялар, форумдар, көрмелер және басқа да ірі іскерлік іс-шараларды өткізу есебінен Астанаға туристер ағынын ұлғайту көзделген.
– Бүгінгі таңда Астана халықаралық конкурстарға белсенді қатысып, халықаралық конгрестер мен конференциялар қауымдастығы (ICCA) арқылы ірі MICE іс-шараларын өткізу құқығын жеңіп алды. 2016 жылдан бастап қала бірқатар маңызды оқиғалардың алаңына айналды, – деген басқарма басшысының орынбасары сол іс-шараларға тоқталды.
Оның айтуынша, 2016 жылдан бастап халықаралық 48 іс-шара өткен. Атап айтқанда, Bizz Awards халықаралық премиясын тапсыру салтанатына 200 адам қатысқан. Топырақ механикасы және геотехника бойынша 17-Азия аймақтық конференциясы (600 қатысушы), INQAAHE конференциясы (275 қатысушы), Студенттік кәсіпкерлік бойынша энактус әлем кубогы (2500 қатысушы).
Ал 2025 жылы Халықаралық талдау, оны қолдану және есептеу қоғамының конференциясы 21-25 шілдеде өтпек. Бұған 1000 адам қатысады деп жоспарланған. Сондай-ақ 18-23 тамыз күндері Кітапханалық қауымдастықтар мен мекемелердің халықаралық федерациясы жиын өткізеді. Оған 3500 адам қатыспақ. 27-28 маусым күндері Walter E.Dandy нейрохирургиялық қауымдастығының 10-Дүниежүзілік конгресі 300 қатысушыны жинамақ.
– Аталған аса маңызды оқиғалар Астананың ірі халықаралық іскерлік орталық ретіндегі имиджі үшін қажет, – дейді Мақсат Жаңабаев.
Медициналық туризм қалай дамиды?
Баяндамашының сөзінше, елімізде 9 медициналық ұйым JCI халықаралық аккредиттеу комиссиясының сертификатын алған. Бұл ұйымдар медициналық қызметтер сапасының «алтын стандарты» ретінде танылды. Ал олардың 7-еуі Астанада орналасқан.
– Елорданың медициналық туризмін дамыту аясындағы жоспарлы жұмыс мыналарды қамтиды: медициналық контент құру, YouTube арнасында қаланың клиникалары мен дәрігерлері туралы имидждік хабарлар шығару; нысаналы елдерде Астана қаласының дәрігерлерімен көшпелі алғашқы медициналық консультациялар өткізу; медициналық туристік базалық пакеттерді қалыптастыру; клиникалар мен туроператорлар арасында серіктестік және бірлескен бағдарламалар құру. Ресей, Өзбекстан, Беларусь, Қытай және БАӘ сияқты Астана үшін медициналық туризмнің нысаналы елдері анықталды. 2025 жылы медициналық туристер саны 8 000 адамға дейін жетеді деп жоспарлануда 2024 жылы 4 500 адам болған еді, – дейді басқарма басшысының орынбасары.
Елорданы аралайды
2025 жылы жастарды дамытуға және бүкіл Қазақстан бойынша балалар мен оқушылардың әлеуметтік интеграциясын қолдауға бағытталған екі әлеуметтік жобаны іске асыруды жалғастыру ұсынылды. Алғашқы жоба – «Астана – менің Отанымның елордасы» аталады. Оның аясында Қазақстанның түрлі өңірлерінен келген халықтың әлеуметтік осал топтарының балалары үшін 3 күндік турлар ұйымдастырылады. Басты мақсат – балаларды елордамыздың мәдениеті мен тарихымен таныстыру, сондай-ақ еліміздің дамуына өзінің қатысуын сезінуге мүмкіндік беру. 2018 жылы, яғни Астананың 20 жылдығына орай осы жобаның шеңберінде 1000 бала елорданы аралады. 2019 жылы – 500 бала, Астананың 25 жылдығы аясында 2023 жылы – 1000 бала, 2024 жылы 1013 бала бас қаланы көрді. Ал 2025 жылға арналған жоспар – 1000 бала.
Оқушылар мен студенттерге кәсіптік бағдарлау
Оқушылар мен студенттерге арналған кәсіптік бағдарлау экскурсиялары ұйымдастырылады. Кәсіптік бағдар беру бағдарламасы аясында 2025 жылы 7-11 сынып оқушылары мен колледждердің 1-курс студенттері үшін 12 200-ден астам экскурсиялық турлар ұйымдастыру жоспарланған.
– Экскурсиялар оқушыларды кәсіпорындар мен жоғары оқу орындарындағы нақты еңбек жағдайларымен таныстыру мақсатында, сондай-ақ олар еңбек нарығының нақты қажеттіліктерін ескере отырып, болашақ мамандықты таңдай алуы үшін ұйымдастырылған, – дейді Мақсат Жаңабаев. Оның айтуынша, өткен жылы да әртүрлі саладағы 40-тан астам кәсіпорында оқушылар мен студенттер үшін 12 200-ден астам экскурсия өткізілді.
Аманғали Қалжанов
