Елорда жылыту маусымына дайын
Астанада орталықтандырылған жылумен жабдықтау жүйесіне қосылған 2455 әлеуметтік нысанның 2335-і немесе оның 90,5 пайызы жылыту маусымына дайын. Оған 2146 тұрғын үй, 28 денсаулық сақтау, 152 білім нысаны және 9 мәдениет мекемесі кіреді.
Астана қаласы Энергетика басқармасының хабарлауынша, 2016-2017 жылдары жылыту маусымы басталғанша энергокешен толықтай дайындық төлқұжатын алады, ал басқа әлеуметтік нысандар мен тұрғын үйлер 100 пайыз дайын болады.
Алдағы жылыту маусымына дайындық пен энергокешенді техникалық ақаусыз жағдайды сақтау аясында «Астанаэнергосервис» АҚ күрделі жөндеу жұмыстарын қолға алды.
«Астана-Энерго» АҚ басты және қосалқы жабдықтарын жөндеу бекітілген кестеге сай жүргізіліп жатыр. Қазіргі кезде ЖЭО-1 – 85%, ЖЭО-2 – 73%, ал аудандық қазандықтар 88 пайыз дайын екен.
«Астана-Теплотранзит» АҚ күрделі жөндеу бағдарламасы бойынша 1,15 шақырым магистральді желі қайта жөнделді. Қазіргі кезде ұзындығы 1,432 шақырым тарату желісін күрделі жөндеу және 3 698 шаршы метрлік құбырдың жылу оқшаулағышы қалпына келтірілді.
Сонымен бірге, «Астана-РЭК» АҚ-да 110 кВ-тық әуе желісін күрделі жөндеу, 10 кВ-тық және 0,4 кВ-тық әуе желілері мен жабдықтарды қалпына келтіру жұмыстары жүргізілуде.