«Бір төл туса, бір түп жусан артық өседі» деген ұлттың қанынанбыз. Сондықтан да, демографиялық ахуалымыздың қанат жаюына мемлекет тарапынан барынша қолдау көрсетіліп, түрлі жәрдемдер қарастырылуда. Әрбір баланың болашағына байыппен қарап, ертеңіне алаңдаймыз. Өмірге келген бүлдіршін – тәуелсіз қазақтың туын ұстаушы, тізгін иесі, тұтқасы. Есімізде болса, ғасырлар тоғысында, яғни, екі мыңыншы жыл есік қаққанда еліміздің барлық өңірінде туған ана мен балаға қаржылай сыйлық жасалған. Енді Тұңғыш Президент күні іңгәлаған сәбиге де, анасына да назар аудардық. Бұл сүйіншілі жайт алдын ала жұртшылыққа құлақтандырылған. Сонымен…
Мереке күні газет тілшілері елордадағы үш перзентхананың табалдырығын аттады. Ең алдымен, Елбасы Нұрсұлтан Назарбаевтың өзі барып, салтанатты жағдайда ашқан №3 қалалық перзентханаға бас сұқтық. Жиырма жеті шарана жарық дүниеге келіпті. Бақытты аналар Валентина Золотарева, Әйгерім Үсенбаева, Ақниет Жұмабаева… деп жалғаса береді. Олар Астана қаласы денсаулық сақтау басқармасы бастығының орынбасары Гүлнар Төлегенованың қолынан «Тұңғыш Президент күні мерекесі» деген әдіпті жазуы бар сәби киімдері мен ескерткіш сыйлықтар алды. «Өмірге келген ұлым екеуміз алған алғашқы сыйдың орны – айрықша. Мен мұны міндетті түрде сақтап қоятын боламын» деп қуанышымен бөлісті жас ана Лилия Файзуллина. «Қызымның осындай айтулы күні туғанына өзімді бақытты сезініп тұрмын», – деді Валентина Золотарева.
Тұңғыш Президент күні №2 қалалық перинаталды орталықта он бес нәресте, №1 перзентханада сегіз нәресте жарық дүние есігін ашты. Дәрігерлер бұл күні туған ұл балалардың есімінің көбісі «Нұрсұлтан» қойылғанын айтады. Жақсы ырым. Тұңғыш рет тойланған Тұңғыш Президент күні өмірге келген елордадағы елу нәресте туған халқына дәл Нұрсұлтандай қызмет етсе, онда ұлт ертеңінің жарқын болары сөзсіз!
Нұрсұлтандардың бауы берік болсын!
Асхат РАЙҚҰЛ
