Астанада «Жастар» сарайының 50 жылдығына арналған «Жастардың мерейтойы» атты салтанатты іс-шара өтті. Мерейтой аясында сарайдың танымал әртістері мен шығармашылық ұжымдарының қатысуымен ауқымды концерт ұйымдастырылды, деп хабарлайды astana-akshamy.kz.
Мерейтойлық кеште еліміздің көрнекті мәдениет және өнер қайраткерлері, елордалық мәслихат депутаттары, сарай ардагерлері, сондай-ақ жастар ұйымдарының өкілдері жиналды.
Астана мәслихатының төрағасы Ерлан Каналимов сарай ұжымын және елорда тұрғындарын мерейтойымен құттықтады.
«Бүгінгі таңда «Жастар» сарайы – жастардың шығармашылық және спорттық әлеуетін дамытуға бағытталған заманауи кешен. Ол жастарды шабыттандырып, олардың рухани дамуына ықпал ете отырып, Астананың мәдени және қоғамдық өмірінің ажырамас бөлігіне айналды. Жылдар ішінде сарай ұжымы өзінің кәсібилігі, белсенділігі мен адалдығының арқасында көптеген жетістікке жетті. Жастар сарайы алдағы уақытта да халқымыздың мәдени мұрасын насихаттайтынына, жаңа биіктерге жететініне, жастарды шабыттандыратынына және еліміздің жарқын болашағын қалыптастыруға үлес қосатынына сенімдімін», – деп атап өтті Ерлан Каналимов.
Мерекелік кеш «Астана» эстрадалық-симфониялық оркестрінің, «Терра» би театрының, «Жігер» эстрадалық-джаз ансамблінің және басқа да әртістердің қойылымдарымен көркемделе түсті. Сондай-ақ, тарихи құжаттарға, естеліктерге және мәдени жетістіктерге арналған көрме ұйымдастырылды.
Мерекелік бағдарлама соңында 50 жылдық мерейтойға орай «Жастар» сарайының әнұраны шырқалды. Әнұранның музыкасын Рустам Әміров, ал сөздерін Алтын Махамбет пен Нұрлыбек Зәкенов жазған.
«Жастар» сарайы қала тұрғындары мен қонақтарына спорттық-сауықтыру және ойын-сауық қызметтерін ұсынатын елорданың оң жағалауындағы маңызды мәдени-жастар нысандарының бірі болып саналады. Қазіргі уақытта кешенде би, вокал, музыкалық аспаптарда ойнау, бейнелеу өнері және брейк-данс сияқты шығармашылық пен спорттың әртүрлі бағыттарын қамтитын 20-дан астам үйірме жұмыс істейді.
Сарайдың спорт кешеніне бассейн, көпфункционалды жазғы спорт алаңы және спорт залы кіреді. Сонымен қатар, сарайда 820 орынға арналған заманауи жарық және дыбыс технологияларымен жабдықталған концерт залы бар. Бұл оны концерттер, спектакльдер және форумдар сияқты әртүрлі мәдени іс-шараларды өткізуге арналған орталыққа айналдырады.
Сарайда ай сайын 2000-нан астам бала мен жасөспірім айналысады. Сонымен қатар, сарай бассейніне күн сайын 500-ге жуық адам, оның ішінде балалар келеді.
