Елордалық әкімдікте энергетика кешенінің күзгі-қысқы маусымға дайындық жұмыстары пысықталды
Қалалық әкімдікте құрылыс, экология, көлік, сауда және тұрғын үй-коммуналдық шаруашылық мәселелері жөніндегі комиссияның отырысы өтті.
Алдымен Энергетика басқармасының басшысы Бақтыбек Жапаев мәслихат депутаттарына елорданы жылумен қамтамасыз ететін кәсіпорындардың кезекті маусымға дайындығын баяндады. Оның айтуынша, Астана қаласын жылумен ЖЭС-1, ЖЭС-2 және «Астана-Энергия» АҚ аудандық қазандықтары қамтамасыз етеді. Бүгінде аталмыш кәсіпорындар негізгі және қосалқы құрал-саймандары бекітілген кестеге сәйкес жөндеу жұмыстарынан өткен.
– Елордада орталықтандырылған жылумен жабдықтау жүйесіне қосылған 2455 әлеуметтік нысан бар. Оған 2146 тұрғын үй, 28 денсаулық сақтау, 152 білім нысаны және 9 мәдениет мекемесі кіреді. 2016-2017 жылдары жылыту маусымы басталғанша, энергокешен толықтай дайындық төлқұжатын алады, ал әлеуметтік нысандар мен тұрғын үйлер 100 пайыз дайын болады, – дейді Энергетика басқармасының басшысы Бақтыбек Жапаев.
Жиында Есіл, Сарыарқа және Алматы ауданы әкімдерінің орынбасарлары да өздеріне тиесілі аумақтағы дайындық жұмыстары туралы баяндады.
Гүлмира ШАРХАНҚЫЗЫ
