Тәуелсіздік сарайында Мемлекеттік рәміздердің 30 жылдық мерейтойына орай Нұр-Сұлтан қаласының Тілдерді дамыту және архив ісі басқармасы «Тіл және рәміз – тәуелсіздік жаршысы» шарасы аясында Мемлекеттік елтаңбаның авторы Жандарбек Мәлібекұлының жастармен кездесуін ұйымдастырды.
Мемлекеттік әнұранның орындалуымен басталған шараны Тілдерді дамыту және архив ісі басқармасының басшысы Сәкен Есіркеп ашып, көпшілікке шараның мақсатын баяндап, мереке аясында қала бойынша атқарылатын іс-шаралар бойынша ақпарат берді.
Жиынның құрметті қонағы Мемлекеттік елтаңбаның авторы, Л.Гумилев атындағы Еуразия ұлттық университетінің профессоры, Қазақстанның еңбек сіңірген қайраткері Жандарбек Мәлібекұлы елтаңбаның жасалу тарихы мен терең мән-мағынасын таныстырды.
Филология ғылымдарының докторы, профессор Серік Негимов Мемлекеттік рәміздердің тәуелсіздік нышаны ретіндегі қадір-қасиеті, мәртебесі жайлы айтып, ел тарихынан тағылымды мағлұмат берді.
Мемлекеттік рәміздердің зерттелуі, жасалу технологиясы жайында Ұлттық геральдика зерттеулер орталығының директоры Асылбек Баяжұма тың деректер айтты. Рәміздерді құрметтеу жайлы жастарға жігерлі сөздерін жеткізді.
