Тәуелсіздік мерекесі қарсаңында Астана қаласының әкімі Иманғали Тасмағамбетов еліміздің әлеуметтік-экономикалық және мәдени саласына еңбек сіңірген, ұлттар арасындағы ынтымақтастық пен достықты нығайтуға үлес қосқан бір топ азаматтарға жоғары мемлекеттік марапаттарды тапсырды.
Жиналған қауымды Тәуелсіздік күнімен құттықтаған қала әкімі осыдан 22 жыл бұрын Қазақстан тәуелсіз даму жолын таңдап, ата-бабамыздың ғасырлар бойы аңсаған арманы ақиқатқа айналғанына тоқталды.
– Тәуелсіздікке жету бар да, оны аялап, баптау бар, елдің сенімін ақтау бар. Міне, осынау жауапты да тарихи сәтте тағдыр бізге көреген көшбасшы сыйлады. Осылайша, біз Елбасы бастап, ел болып қоштап, дамудың дұрыс жолын таңдадық. Президенттің терең саясаты мен пайымды парасатының арқасында бүгінде мемлекетіміз әлемдік қауымдастықтың беделді мүшесіне айналды. Сөз жоқ, осындай алып үрдістің оң болуына еңбегімен де, ерлігімен де тікелей себепші болған азаматтарымыз жетерлік. Солардың бір тобы – сіздерсіздер. Ел еңбектеріңізді жоғары бағалап, бүгін міне, Елбасының Жарлығымен жоғары мемлекеттік марапатқа ие болып отырсыздар, – деді Иманғали Нұрғалиұлы.
Сонымен Мемлекет басшысы атынан қала әкімінің қолынан марапат алғандардың бірі – Астана қаласы Ішкі істер департаментінің басшысы Амантай Әубәкіров ІІ дәрежелі «Даңқ» орденімен марапатталды. Ал, «Парасат» ордені белгілі жазушы Төлен Әбдікке, Астана қаласы денсаулық сақтау саласының ардагері Қаршыға Құлмұқановқа және Л.Гумилев атындағы Еуразия ұлттық университетінің профессоры Қойшығара Салғараұлына берілді.
ІІ дәрежелі «Достық» орденін «Таң» татар-башқұрт мәдени орталығы төрағасының орынбасары Рафаиль Аблаков еншіледі.
«Құрмет» ордені белгілі ғалым Мырзагелді Кемел мен жазушы Қажығали Мұханбетқалиұлына, «Калык Транс» ЖШС бас директоры Тайжан Айхымбековке, «Бейбітшілік және келісім сарайы» МКҚК бас директоры Дильбар Амироваға, «Елордалық бокс федерациясы» ҚБ вице-президенті Дәурен Башиковқа, «Елорда асханасы» ЖШС директоры Жанат Бекболатоваға, «Бекзат» фирмасы» ЖШС директоры Есенжол Бекішевке, «Астана» корпоративтік қорының директоры Гүлнәр Данбаеваға, Астана қаласы Табиғи ресурстар және табиғатты пайдалануды реттеу басқармасы басшысының орынбасары Юсуп Келиговке, «Agua-rest» ЖШС-ның коммерциялық директоры Александр Кимге, «Бахус Астана» ЖШС директоры Алмаз Кимге, «Казахдорстрой» ЖШС басқарма төрағасы Талғат Қожахметовке, «Ұлттық ғылыми медициналық орталық» АҚ бөлім басшысы Болат Көпеновке, Астана қаласы Құрылыс басқармасының басшысы Владимир Лютовке, «КазАртБронза» ЖШС бас суретшісі Мұрат Мансұровқа, Астана қаласы Жер қатынастары басқармасының басшысы Төлеуғазы Нүркеновке, тағы басқа азаматтарға табысталды.
Ал «Ерен еңбегі үшін» медалімен «Бәйтерек» халықаралық медиа-орталық» ЖШС директоры Жанар Колбачаева, «Елорда-Жарнама» ЖШС бас директорының орынбасары Жанар Әбішева, «Астананың шаруашылық басқармасы» ЖШС бас менеджері Юлия Әділбекова, № 32 мектеп-гимназияның директоры Виктор Гродер, Экономика және бюджеттік жоспарлау басқармасы басшысының орынбасары Гүлнәр Жүсіпова, «Астана-Теплотранзит» АҚ қызмет басшысы Рауза Кәкенова сынды азаматтар марапатталды.
Биыл мемлекеттік наградаға қол жеткізгендердің қатарында шынымен де ұзақ еңбек жолдан өткен, өмірі өзгеге өнеге жандар қарасы молынан болды. Сондай-ақ, қарапайым еңбек адамдарын да көзіміз шалды. Айталық, «Қарттар мен мүгедектерге арналған медициналық-әлеуметтік мекемесі» КММ санитары Күлшат Достанова, Райымбек батыр атындағы №50 «Қазғарыш» мектеп-лицейінің мұғалімі Рабиға Иманқұлова, № 70 мектеп-лицейдің мұғалімі Меруерт Қуатбекова,
«№ 1 автобус паркі» АҚ жүргізушісі Қанат Күлтаев «Ерен еңбегі үшін» медалін тақты.
«Қазақстанның еңбек сіңірген қайраткері» құрметті атағын «Қазақстан» РТРК» АҚ басқарма төрағасының кеңесшісі Нұртілеу Иманғалиұлы, Қ.Қуанышбаев атындағы Мемлекеттік академиялық қазақ музыкалық драма театрының әртістері Болат Ыбыраев және Ерлан Малаев иеленді.
Қымбат ТОҚТАМҰРАТ
