Еңбек елге танытады
Ардақты ана, аяулы әже,
«Құрметті теміржолшы» белгісінің
иегері Күлән Қазкенқызы Сағымбаеваның бүкіл ғұмыры әсем Астанамызбен астасқан. Осында дүниеге келіп, орта білім алды. Еңбек жолын да туған жерінен бастап, өмірінің 35 жылын Ақмола теміржолына арнады. Бір сөзбен айтқанда, елорданың арғы-бергі тарихы көз алдында өткен.
Айтпақшы, апамыз жайлы жазуға бекінген алғашқы адам емеспіз. Сонау 1952 жылы, Жамбыл атындағы №4 қазақ орта мектебін күміс медальмен бітіргенде ол туралы «Сталин туы» газетінде жазылған. Содан жарты ғасырдан астам уақыттан кейін, Қазақстан темір жолының 100 жылдық мерейтойына орай дайындалған «Қазақстанның белгілі теміржолшылары» жинағының алтыншы шығарылымында да Күлән Қазкенқызының еңбегіне кезінде темір жол басшыларының бірі болып, ҚР Премьер-министрінің бірінші орынбасары қызметіне дейін көтерілген Нығметжан Есенғарин баға берген. Және сол шығарылымда 33 адамның еңбегі аталса, соның екеуі ғана әйел затынан еді. Соның бірі – Күлән Сағымбаева. Бұл фактінің өзі кейіпкеріміздің ерен де, абыройлы қызмет атқарғанынан хабар береді. Бастапқы арманы философ болу болатын. Алайда Ленинград темір жол институтының түлегі, әкесінің інісі Балбейістің ықпалымен теміржолшы мамандығын таңдады. Содан мектеп бітірген жылы сол кездегі одақ астанасына бір-ақ тартты. Айы оңынан туып, Мәскеу көлік-экономикалық институтының жоспарлау-экономикалық факультетінің студенті атанды.
Қолына дипломын алған соң Алматыға шақырту түскеніне қарамастан, кірін жуып, кіндігін кескен жері – Ақмолаға оралды. Еңбек жолын Қарағанды темір жол басқармасына қарасты Ақмола локомотив депосында нормалаушы болып бастады. Еңбегімен көзге түсіп, тура сол жылы Қарағанды темір жол басқармасы қаржы бөлімінің экономисті қызметіне тағайындалды. Бұл жолды қайта жасақтауға байланысты, бір жылдан соң Ақмола темір жол бөлімшесінің қаржы бөлімінің аға бухгалтері қызметіне ауыстырылды.
Әрі қарай инженер-экономист, аға инженер-экономист, қаржы бөлімі бастығының орынбасары, темір жол бөлімшесінің жоспарлау-экономикалық бөлімінің бастығы қызметтерін атқарды. Бұл жылдары ұжымдағы беделі де өсіп, қалалық еңбекші депутаттар кеңесінің екі шақырылымының депутаты болды. Ал бұл тек қана өз саласындағы жұмыстарға ғана емес, жалпы қаладағы істерге араласу, түйткілді мәселелер туындаса, солардың оң шешілуіне ықпал ету деген сөз.
Осылайша қарапайым экономистен бөлім бастығына дейін өскен кейіпкерімізге 1977 жылы құрылған тың темір жолының қаржы қызметі сеніп тапсырылды. Бұл қызметте ол зейнеткерлікке шыққанға дейін табан аудармастан он бес жыл еңбектенді.
Тың темір жолының құрамында бірнеше бөлімше болатын. Соның бәрі дұрыс жұмыс істеуі үшін қаржымен қамтамасыз ету, әрі теміржолшыларға жалақы бөлу Күлән Қазкенқызының мойнына жүктелді. Сондай-ақ, өндірістік нысандардың құрылысы мен жөндеуіне, тұрғын үйлердің құрылысына, әлеуметтік-тұрмыстық салаға да қаржы қарастыру секілді жұмыстардың жауапкершілігі алдынғылардан кем түспеді. Білікті қаржыгер мамандардан кадр жасақтау да оңай іс емес еді. Мұны да басқа істермен бірге дөңгелетіп әкетті. Нәтижесінде К.Сағымбаева жасақтаған ұжым темір жолдың шаруашылық қызметін аз уақытта жолға қойып, үздіктердің қатарына енді.
Тың темір жолы толығымен шаруашылық есеп жүргізу мен өзін-өзі қаржыландыруға көшкені үшін К.Сағымбаеваны сала министрі 1978 жылы «Құрметті теміржолшы» белгісімен марапаттады.
Аталмыш темір жолдың құрылуымен жаңа тораптардың, екінші жолдардың, электр желілерінің, вокзалдар мен өндірістік ғимараттардың үлкен құрылысы қолға алынып, тораптар автобұғатпен және диспетчерлік орталықпен жабдықталды. Тұрғын үйлердің, әлеуметтік-мәдени нысандардың құрылысына мән берілді.
Күлән Қазкенқызы тек кадр жасақтаумен ғана емес, жастардың арасында қаржыгерлер мен бухгалтерлердің шығуына, олардың біліктілігі көтерілуіне білек сыбана ат салысты. Сол үшін Целиноград темір жол техникумының сырттай бөлімінде бухгалтерлерді дайындау бойынша мемлекеттік емтихан комиссиясының төрайымы болды. Осы жылдары темір жол басқармасы мен облыстың қоғамдық өміріне белсене араласты. Жол басқармасы аппараты әйелдер кеңесінің төрайымы, басқарма парткомитеті мен облыстық кәсіподақтың ревизиялық комиссиясының мүшесі болып сайланып, бірнеше рет түрлі конференцияларға делегат ретінде қатысты. Бір салада көп жылғы адал еңбегі үшін 1986 жылы «Еңбек ардагері» медалімен марапатталды.
Сөзіміздің басында Күлән Сағымбаева ардақты ана екенін айттық. Балаларының әкесі Сейфолла Ыбырайымбаевпен сонау 1942 жылы мектепке барған шағында танысқан. Дұрысы, мектеп табалдырығынан екеуі бірге аттаған. Жоғары білімді де бір қаладан алды. Айырмашылығы – Сейфолла Жұмабекұлы
Мәскеудің түсті металдар мен алтын
институтын бітірген. Оқуларын аяқтағасын бір жылдан кейін шаңырақ көтерген. Оған да биыл 55 жыл.
Бұл шаңырақты теміржолшылар әулеті десек те болады. Себебі, К.Сағымбаева ағайынан үлгі алып, осы мамандықты таңдаса, кейіннен ұлдары Талғат пен Жанат, қызы Гүлнәр да аналарының жолын қуып, темір жол саласына қатысты мамандықтардың иесі атанды. Немерелерінің арасында да әжелерінің ісін жалғастырушылар бар.
Келесі жылы, Алла қаласа, сексеннің сеңгіріне шығады. Осы жылдары Ақмола, Целиноград, одан соң қайта Ақмола, 1998 жылы Қазақстанның бас қаласы атанған Астананың кешегісі көкірегінде сайрап тұрса, бүгінгісі көз алдында. Жадысы әлі де мықты.
Бала кезінде иманды ата-әжелерінің мұсылмандықтың парыздары – намазды оқығанын, ораза ұстағанын көрді. 1992 жылы зейнеткерлікке шыққан соң оған да ден қойды. Қазір бес уақыт намазын қаза қылмайды, Рамазан айында ауыз да бекітеді.
Аманғали ҚАЛЖАНОВ